Ադրբեջանական տեղեկատվական ռեսուրսներում տարածված տեղեկությունն այն մասին, որ ռուսական խաղաղապահ զորախումբն իր ուժերի մի մասը դուրս է բերում Արցախից Ուկրաինա, չի համապատասխանում իրականությանը։ Այս մասին ասված է Արցախի Հանրապետության Անվտանգության խորհրդի մարտի 10-ին տարածած հայտարարության մեջ։ «Արցախում տեղակայված Ռուսաստանի Դաշնության խաղաղապահ զորախումբը շարունակում է իրականացնել իր առաքելությունը՝ համաձայն 2020 թվականի նոյեմբերի 9-ի եռակողմ հայտարարության։ Մենք կոչ ենք անում բնակչությանը չտրվել խուճապային տրամադրություններին։ Իրավիճակը լիովին վերահսկվում է Արցախի իշխանությունների և ռուսական խաղաղապահ կոնտինգենտի կողմից»,- ասված է հաղորդագրության մեջ։
