ԱԺ հանձնաժողովը դրական եզրակացություն է տվել Ընտրական օրենսգրքում փոփոխություններին

379

Հոկտեմբերի 26-ին Գեւորգ Կոստանյանի նախագահությամբ տեղի է ունեցել ՀՀ ԱԺ պետական-իրավական եւ մարդու իրավունքների պաշտպանության հարցերի մշտական հանձնաժողովի նիստ: Առաջին ընթերցումով քննարկվել է «ՀՀ ընտրական օրենսգիրք» ՀՀ սահմանադրական օրենքում փոփոխություններ եւ լրացումներ կատարելու մասին», «Հանրաքվեի մասին» ՀՀ սահմանադրական օրենքում փոփոխություն կատարելու մասին», «Վարչական իրավախախտումների վերաբերյալ ՀՀ օրենսգրքում լրացումներ կատարելու մասին» եւ «Պաշտպանության մասին» ՀՀ օրենքում լրացում կատարելու մասին» ՀՀ ԱԺ պատգամավորներ Նաիրա Զոհրաբյանի, Գեւորգ Պետրոսյանի, Լենա Նազարյանի, Ալեն Սիմոնյանի եւ Վահե Էնֆիաջյանի հեղինակած օրենսդրական փաթեթը:


Օրենսդրական առաջարկի համահեղինակ Գեւորգ Պետրոսյանն անդրադարձել է հիմնարար փոփոխություններին, որոնք մասնավորապես վերաբերել են ռեյտինգային ընտրակարգի վերացմանը, պարզ համամասնական ընտրակարգին անցմանը, խորհրդարան մուտք գործելու շեմի իջեցմանը՝ կուսակցությունների համար 4, քաղաքական դաշինքների համար 6 տոկոս, բոնուսային համակարգի վերանայմանը, զորամասերում նախընտրական քարոզարշավը մատչելի դարձնելուն: Նա վերահաստատել է ՀՀ ԱԺ «Ծառուկյան» խմբակցության՝ խորհրդարանական արտահերթ ընտրությունները դեկտեմբերին բարեփոխված Ընտրական օրենսգրքով անցկացնելու դիրքորոշումը: Պատգամավորի համոզմամբ՝ բարեփոխված օրենսգիրքը կնպաստի նախընտրական պայքարում քաղաքական բաղադրիչի ուժեղացմանը եւ խորհրդարանում քաղաքական բազմակարծության ապահովմանը:


Գեւորգ Կոստանյանը հարակից զեկույցում ընդգծել է, որ փաստաթղթին վերաբերում է որպես իրավական ակտ, այլ ոչ թե քաղաքական գործոն: Նշելով, որ նախաձեռնությունն ընտրական գործընթացների բարեփոխմանն ուղղված միջոց կլինի՝ հանձնաժողովի նախագահն առաջարկել է գործընկերներին կողմ քվեարկել:


ՀՀ արդարադատության նախարարի առաջին տեղակալ Արթուր Հովհաննիսյանը ներկայացրել է գործադրի առաջարկը, որով նախատեսվում է առաջին հոդվածից հանել 6-րդ կետը: Այն վերաբերում է զորամասում զինծառայողների թվի բացահայտմանը: Առաջարկն ընդունվել է հանձնաժողովի անդամների կողմից:


Քննարկումների արդյունքում հանձնաժողովը հոկտեմբերի 29-ի ԱԺ արտահերթ նիստի օրակարգում ընդգրկված օրենսդրական փաթեթի վերաբերյալ տվել է դրական եզրակացություն:


 

Տպել

Թեմայի այլ նորություններ
Загрузка...