Ապրիլի 24-ին Թբիլիսիում անցկացվեց հուշ-երեկո՝ նվիրված Հայոց ցեղասպանության

Ապրիլի 24-ին Թբիլիսիում անցկացվեց հուշ-երեկո՝ նվիրված Հայոց ցեղասպանության 109-րդ տարելիցին։ Միջոցառումը կազմակերպվել էր Վրաստանում ՀՀ դեսպանության և Հայ Առաքելական Սուրբ եկեղեցու Վիրահայոց թեմի կողմից։

Հուշ-երեկոյին մասնակցում էին Վրաստանի խորհրդարանի պատգամավորներ, Վրաստանում հավատարմագրված դեսպաններ և դիվանագիտական կորպուսի ներկայացուցիչներ, հասարակական-մշակութային գործիչներ, վիրահայ համայնքի ներկայացուցիչներ։

Ելույթներով հանդես եկան Վրաստանում ՀՀ դեսպան Աշոտ Սմբատյանը և վրաց պատմաբան, պրոֆեսոր Նիկոլոզ Ալեքսիձեն, միջոցառման ավարտին ներկաներին դիմեց Վիրահայոց թեմի առաջնորդ Գերաշնորհ Տեր Կիրակոս եպիսկոպոս Դավթյանը։
Իր ելույթում ՀՀ դեսպանը խոսեց պատմության ձևախեղման և ժխտման փորձերի և դրանից առաջացող վտանգների մասին, քանի որ դա պարարտ հող է ստեղծում արդեն մեր օրերում մարդկության դեմ նոր հանցագործությունների իրականացման համար, որի ականատեսը եղավ ամբողջ աշխարհը 2023թ. սեպտեմբերին Լեռնային Ղարաբաղում։ Այս համատեքստում ընդգծվեց պատմական փաստերի և իրողությունների ճանաչման առանցքային նշանակությունը՝ ժողովուրդների միավորման և համատեղ ջանքերով խաղաղ ապագայի կառուցման համար։

Ոգեկոչման երեկոն ուղեկցվեց Գերմանիայից հրավիրված սոպրանո Կարինե Բաբաջանյանի, վրաց դաշնակահար Գիորգի Շիոլաշվիլիի և Երևանի Չայկովսկիի անվան երաժշտական դպրոցի քառյակի կատարումներով։