Մայիսմեկյան տրամադրություն Երևանում. քաղաքացիներն աջակցություն են հայտնում Փաշինյանին

Այս պահին Հանրապետության հրապարակում տասնյակ հազարավոր մարդիկ են, Երևանի փողոցներում, չնայած ոչ աշխատանքային օրվա, եռագույններով պատված ավտոմեքենաների ակտիվ շարժ է: Պատճառը ոչ թե Աշխատավորների միջազգային օրն է, այլ վարչապետի ընտրությունը, որը կմեկնարկի արդեն մեկ ժամից խորհրդարանում:

Գիշերը ՀՀ վարչապետի թեկնածու Նիկոլ Փաշինյանը հորդորեց բոլորին առավոտյան 11-ից հավաքվել հրապարակում, քանի որ Հանրապետական կուսակցություն որոշել է տապալել վարչապետի ընտրությունը:

Առավոտվանից մայրաքաղաք են ժամանում ավտոշարասյուններ Հայաստանի տարբեր քաղաքներից, անգամ ամենահեռավոր մարզերից:

Հրապարակում բարձր տրամադրություն է՝ գունավոր փուչիկներ, երաժշտություն, պաստառներ, որոնց վրա գրված է «Նիկոլ վարչապետ» , «Հաղթանակ» և այլն:

Ի դեպ, Ազգային ժողովի հատուկ նիստից առաջ էլ ՀՀԿ-ն հայտարարում է, որ դեռ վերջնական որոշում չունի, թե ինչպես է քվեարկելու վարչապետի ընտրության ժամանակ և որոշումը կլինի միայն թեկնածու ծրագրերին ծանոթանալուց հետո:

Հիշեցնենք, վարչապետ ընտրվելու համար Նիկոլ Փաշինյանը պետք է ստանա 105 պատգամավորներից 53-ի աջակցությունը: ԱԺ երեք խմբակցություն հայտնել է իր աջակցությունը նրան՝ «Ծառուկյան» և «Ելք» խմբակցությունները, ինչպես նաև ՀՅԴ-ն: Վճռորոշ է լինելու ՀՀԿ-ի քվեարկությունը: