Դասադուլն ու հացադուլը դադարեցվեց. ի՞նչ են քննարկել ԱԺ ղեկավարությունն ու ուսանողները

Տարկետումը սահմանափակող օրենքի դեմ բողոքի ակցիա իրականացնող ուսանողները կդադարեցնեն դասադուլն ու հացադուլը: Այս մասին լրագրողներին հայտնեց «Հանուն գիտության զարգացման» նախաձեռնության անդամ Դավիթ Պետրոսյանը՝ ԱԺ նախագահ Արա Բաբլոյանի և ԱԺ փոխնախագահ Էդուարդ Շարմազանովի հետ փակ հանդիպումից հետո:

Նա նշել է, որ համաձայնություն է ձեռք բերվել նոյեմբերի 22-ին կլոր սեղան կազմակերպել գիտության, կրթության ոլորտների, կառավարության եւ շահագրգիռ կողմերի ներկայացուցիչների հետ, քննարկել հարցը և փորձել լուծումներ առաջարկել: Իսկ եթե այդ քննարկման ժամանակ բողոքող երիտասարդները կարողանան ապացուցել իրենց պահանջի օբյեկտիվությունը, ապա հնարավոր է՝ որոշ զիջումներ լինեն, որոնք կկարգավորվեն արդեն ընդունված օրենքից բխող նորմերով:

«Հացադուլը ինքնանպատակ չէր, այն պետք է դադարեցնել, քանի որ այն ծառայեց իր նպատակին»,- ասել է Պետրոսյանը:

Նշենք, որ քիչ առաջ Ազգային Ժողովում կայացել է փակ հանդիպում ԱԺ ղեկավարության և հինգ ուսանողների միջև:

Այսօր առավոտյան ԱԺ-ն ընդունեց «Զինվորական ծառայության եւ զինծառայողի կարգավիճակի մասին» ՀՀ օրենքը: Դրան զուգահեռ ԱԺ շենքի դիմաց ընթանում էր բողոքի ակցիան, որին ավելի ուշ միացան նաև երեկվանից ԵՊՀ-ում հացադուլ հայտարարած ուսանողները: Ոստիկանների և երիտասարդների միջև նաև որոշակի քաշքշուկ տեղի ունեցավ և այս պահին բողոքի ակցիայի մասնակիցները պնդում են, որ մասնակիցներից մեկին ոստիկանությունը բերման է ենթարկել: Սակայն ոստիկանությունից պարզաբանել են, որ Ռոբերտ Գրիգորյանը Քննչական կոմիտեի կողմից քննվող քրեական գործի շրջանակներում է բերման ենթարկվել: