Բաքվում կանցկացվեն Ադրբեջան-ԵՄ նոր համաձայնագրի բանակցությունները. Մամեդյարով

Հոկտեմբերի վերջին Եվրոպական հանձնաժողովի ներկայացուցիչները կժամանեն Բաքու՝ Ադրբեջանի և Եվրամիության միջև ռազմավարական գործընկերության մասին նոր համաձայնագրի երկրորդ գլխի քննարկումների համար: Այդ մասին հայտարարել է Ադրբեջանի արտգործնախարար Էլմար Մամեդյարովը Բաքվում պաշտոնական այցով գտնվող լեհ գործընկեր Վիտոլդ Վաշիկովսկիի հետ համատեղ մամուլի ասուլիսի ժամանակ, հայտնում է «Թրենդ» գործակալությունը:

«Ադրբեջանական կողմը պատրաստ է ԵՄ-ի հետ քննարկել բոլոր ոլորտներում հարաբերությունները: Եվ այդ առումով նոր համաձայնագիրը մեզ համար ռազմավարական նշանակություն ունի»,- հավելել է նախարարը:

Անցած տարվա նոյեմբերին ԵՄ խորհուրդը Եվրոպական հանձնաժողովին և արտաքին գործերի և անվտանգության քաղաքականության հարցերով բարձր ներկայացուցչին ԵՄ-ի և դրա անդամ պետությունների անունից Ադրբեջանի հետ համապարփակ համաձայնագրի վերաբերյալ բանակցություններ վարելու մանդատ է տվել: