Ռուսաստանն ու Հայաստանը որոշել են զորքերի կազմը, որոնք գործելու են ՀՕՊ Միացյալ տարածաշրջանային համակարգի շրջանակում՝ Հավաքական անվտանգության Կովկասյան տարածաշրջանում, երեքշաբթի այս մասին հայտնել է գլխավոր շտաբի ղեկավար, ՌԴ Օդիատիեզերական ուժերի գլխավոր հրամանատարի առաջին տեղակալ, գեներալ- լեյտենանտ Պավել Կուրաչենկոն, փոխանցում է ՌԻԱ Նովոստին։
«Որոշվել է զորքերի ցանկը, որոնք Ռուսաստանի Դաշնությունն ու Հայաստանի Հանրապետությունը հատկացնելու են Հավաքական անվտանգության կովկասյան տարածաշրջանում ՀՕՊ Միավորված տարածաշրջանային համակարգի կազմի համար»,- ասել է Կուրաչենկոն ՝ ՀՕՊ հարցերով Համակարգող հանձնաժողովի նիստի ժամանակ։
Նրա խոսքով՝ սկսվել է ՀՕՊ Միացյալ տարածաշրջանային համակարգի ստեղծման մասին երկու երկրների միջեւ համաձայնագրի գործնական իրականացմանն ուղղված փաստաթղթերի մշակումը։ Փաստաթուղթը ստորագրվել է Մոսկվայում 2015-ի դեկտեմբերի 23-ին ու վավերացվել է ՌԴ Պետդումայի կողմից 2016-ի դեկտեմբերին։ Համաձայնագիրը կնքվել է 5 տարի ժամկետով՝ 5-ամյա ժամկետներով ավտոմատ երկարացման հնարավորությամբ։
Երեքշաբթի Աստրախանում անցել է ԱՊՀ երկրների պաշտպանության նախարարների խորհրդին կից հակաօդային պաշտպանության հարցերով համակարգող հանձնաժողովի նիստը, որին մասնակցում են պատվիրակություններ Ռուսաստանի, Հայաստանի, Բելառուսի, Ղազախստանի, Ղրղզստանի, Տաջիկստանի, Ուզբեկստանի ու Թուրքմենստանի պաշտպանության նախարարություններից։
Փորձագետների կարծիքով, ՀՀ-ի և ՌԴ-ի միջև հարավային անվտանգության կովկասյան տարածաշրջանում ՀՕՊ միավորված տարածաշրջանային համակարգը, առաջին հերթին, ծավալվում է ընդդեմ Թուրքիայի, որը Ռուսաստանի համար հիմնական սպառնալիքն է տարածաշրջանում: Այս կարծիքն է կիսում ՀՀ պաշտպանության նախկին նախարար Վաղարշակ Հարությունյանը:
«Հասկանալի է, որ Ռուսաստանի նկատմամբ Վրաստանի կամ Ադրբեջանի ագրեսիայի հնարավորությունը չնչին է: Մինչդեռ Ռուսաստանի դեմ Թուրքիայի ռազմական ագրեսիան կարող է իրականացվել Սեւ ծովից կամ Հայաստան ներխուժման միջոցով»,- մեկնաբանելով այս հարցը՝ ընդգծել էր Հարությունյանը:
Հարությունյանը կարծում է, որ այդ համաձայնագիրը նվազեցնում է Հայաստանի տարածք Թուրքիայի ներխուժման հավանականությունը, հաշվի առնելով, որ այդ դեպքում պատերազմի մեջ կներքաշվի նաև միջուկային տերություն` ի դեմս Ռուսաստանի, որը նաև ՄԱԿ Անվտանգության խորհրդի մշտական անդամ է: «Դա կստեղծի Ռուսաստան-ՆԱՏՕ բախման սպառնալիք, ինչից միջուկային տերություններ ԱՄՆ-ն և Ռուսաստանը հետևողականորեն խուսափում են»,- նշում է պաշտպանության նախկին նախարարը:
Ընդ որում, գեներալը համոզված է, որ այդ համաձայնագրերը Հայաստանին չեն ներքաշի որևէ երկրի դեմ Ռուսաստանի պատերազմի մեջ, քանի որ ՀՕՊ միավորված համակարգը գործում է միայն Հայաստանի և Ռուսաստանի նկատմամբ ագրեսիայի դեպքում:
