Եվրամիության հետ հարաբերությունների սերտացումը սպառնալիք չէ Մոսկվայի համար. ՀՀ դեսպան

Հայաստանի արտաքին քաղաքականության սեյսմիկ տեղաշարժը, որը հանգեցրել է Եվրամիության հետ հարաբերությունների սերտացմանը, սպառնալիք չէ Մոսկվայի համար: Այս մասին հայտարարել է Բրյուսելում ՀՀ դեսպան Տիգրան Բալայանը Politico-ին տված հարցազրույցում։

«Հայաստանը, աշխարհագրական դիրքով պայմանավորված, պատմական և գործնականում այնքան շատ կապեր ունի Ռուսաստանի հետ, որ միայն անիրատես մարդիկ կարող են մտածել, որ Հայաստանը կդիմի ինքնասպանական քայլի՝ փորձելով խարխլել ռուսական շահերը տարածաշրջանում»,- նշել է Բալայանը։

Նրա խոսքով, Հայաստան-ԵՄ հարաբերությունները հիմնված են հայկական ազգային շահերի վրա. «Ներկայում մեր ազգային շահը պահանջում է, որ մենք օրինակելի հարաբերություններ ունենանք ԵՄ-ի և նրա բոլոր անդամ երկրների հետ: Դա չի բացառում Ռուսաստանի հետ երկկողմ լավ հարաբերությունները, և դա մի բան է, որը մենք ցանկանում ենք բացատրել մեր ռուս գործընկերներին»,- հավելել է նա։

Անդրադառնալով Հայաստանի կողմից իր անդամակցությունը ՀԱՊԿ ռազմական դաշինքին սառեցնելու հանգամանքին, Բալայանը շեշտեց՝ դա չպետք է դիտարկել որպես Ռուսաստանի հաշվին շրջադարձ դեպի Արևմուտք.

«Երբ մենք այս հարցերի մասին խոսում ենք ռուս դիվանագետների հետ՝ ասելով, թե ինչ ենք անում, երբեք որևէ հակափաստարկ չեմ ստացել, թե ինչու չպետք է այսպես անենք կամ ինչպես կարող են եվրոպական և ամերիկյան ներդրումները Հայաստանի տնտեսությունում վնասել ռուսական շահերին»,- եզրափակել է նա: