Կառավարությունը հաստատեց տրանսպորտի նախարարության շենքը աճուրդի դնելու որոշումը

ՀՀ կառավարությունը հաստատեց տրանսպորտի, կապի ու տեղեկատվական տեխնոլոգիաների նախարարության շենքը աճուրդի դնելու որոշման նախագիծը:

Ինչպես ավելի վաղ VERELQ-ը տեղեկացրել էր, 2016 թվականի սեպտեմբերի 13-ի դրությամբ գույքի գնահատված արժեքը կազմում է 13 միլիարդ 223 միլիոն 400 652 դրամ: Աճուրդով օտարման ենթակա գույքի մեկնարկային գինը՝ գնահատված արժեքի 100 տոկոսի չափով՝ 13 223 400 652 դրամ: 

ՀՀ կառավարությանն առընթեր պետական գույքի կառավարման վարչություն է ներկայացվել Երևան քաղաքի Նալբանդյան փող. թիվ 28 հասցեում գտնվող շենքի գնահատման համար անհրաժեշտ ելակետային տվյալների փաթեթ, որի հիման վրա 2003 թվականի հունիսի 13-ի թիվ 882 որոշմամբ սահմանված կարգին համապատասխան նախապատրաստվել և շրջանառության մեջ է դրվել «Պետական գույքն օտարելու մասին» ՀՀ կառավարության որոշման նախագիծը:

Նախագծով առաջարկվում է` «Հայաստանի Հանրապետության տրանսպորտի, կապի և տեղեկատվական տեխնոլոգիաների նախարարության աշխատակազմ» պետական կառավարչական հիմնարկին ամրացված Նալբանդյան փողոց 28 հասցեում գտնվող շենքը և դրա օգտագործման ու սպասարկման համար հատկացված հողամասից բաժնային մաս հանդիսացող 0.252065 հա մակերեսով հողամասը (անշարժ գույքի նկատմամբ իրավունքների պետական գրանցման վկայական՝ N07092016-01-0042) օտարել դասական աճուրդով: