Տիգրան Խաչատրյանը Ֆրանսիայի նորանշանակ դեսպանի հետ է հանդիպել

Փոխվարչապետ Տիգրան Խաչատրյանն օգոստոսի 18-ին ընդունել է ՀՀ-ում Ֆրանսիայի նորանշանակ դեսպան Օլիվիե Դըկոտինյիին: Այս մասին տեղեկանում ենք փոխվարչապետի գրասենյակից:

Տիգրան Խաչատրյանը շնորհավորել է դեսպանին նշանակման կապակցությամբ՝ համոզմունք հայտնելով, որ կներդրվեն առավելագույն ջանքերը հայ-ֆրանսիական բարեկամական հարաբերությունների շարունակական ամրապնդման եւ ընդլայնման ուղղությամբ: Փոխվարչապետը բարձր է գնահատել տարածաշրջանում արդարացի խաղաղության հաստատմանն ուղղված ջանքերում Ֆրանսիայի դերակատարությունը՝ հատուկ ընդգծելով նաեւ Լաչինի միջանցքի շուրջ ութ ամիս շարունակվող եւ վերջին երկու ամիսներին բացարձակ արգելափակման հետեւանքով հումանիտար աղետը կանխելուն ուղղված Ֆրանսիայի հասցեական հայտարարություններն ու ջանքերը, այդ թվում՝ Լեռնային Ղարաբաղի հումանիտար աղետի հարցով ՄԱԿ ԱԽ-ում գումարված արտահերթ նիստի շրջանակներում։

Դեսպան Դըկոտինյին շնորհակալություն է հայտնել ջերմ ընդունելության համար եւ վերահաստատել Ֆրանսիայի՝ փոխգործակցությունը խորացնելու եւ երկկողմ օրակարգը համագործակցության նոր ուղղություններով լրացնելու հանձնառությունը։

Հանդիպման ընթացքում կողմերը մտքեր են փոխանակել նաեւ հայ-ֆրանսիական համագործակցության օրակարգի մի շարք կարեւոր հարցերի, այդ թվում՝ երկկողմ տնտեսական եւ ապակենտրոնացված համագործակցության վերաբերյալ։ Բարձր է գնահատվել նաեւ Զարգացման ֆրանսիական գործակալության հետ ձեւավորված արդյունավետ համագործակցությունը ոռոգման համակարգերի արդիականացման, գյուղատնտեսության եւ մի շարք այլ ոլորտներում՝ կարեւորելով նոր ծրագրերի իրականացման անհրաժեշտությունը: