Ղարաբաղյան հիմնախնդիրը կարող է լուծել միայն Ռուսաստանը, այդ իսկ պատճառով Վլադիմիր Պուտինի հետ այսօրվա հանդիպմանը Սոչիում ես դարձյալ այդ հարցը կբարձրացնեմ: Անադոլուի հաղորդմամբ, այս մասին հայտարարել է Թուրքիայի նախագահ Ռեջեփ Թայիփ Էրդողանը: Նրա խոսքով, ավելի վաղ ինքը այդ խնդիրը քննարկել է Պուտինի հետ և վերջինս ասել է, որ Ռուսաստանն անում է ամեն հնարավորը խնդրի կարգավորման համար: "Ես հորդորել էի ՌԴ նախագահին լինել ավելի ուշադիր հինգ շրջանների վերադարձի հարցին, քանզի այդ հարցը կարող է լուծել միայն Ռուսաստանը: Այսօր ես այդ հարցը նորից կբարձրացնեմ, քանի որ ղարաբաղյան հիմնախնդիրը մեզ համար հանդիսանում է ազգային հարց",- ասել է Էրդողանը: Ավելի վաղ VERELQ-ը տեղեկացրել էր, որ Էրդողանը նշել է, որ ՌԴ նախագահ Վլադիմիր Պուտինի հետ հանդիպմանը քննարկվել է նաև ղարաբաղյան հակամարտությունը: «Պարոն Պուտինի հետ մենք քննարկել ենք ղարաբաղյան հակամարտությունը: Ռուսաստանն ազդեցություն ունի Հայաստանի վրա: Կան ընդունված որոշումներ, որոնք առնչվում են գրավված յոթ շրջաններից հինգին: Մենք նշել ենք այդ որոշումների կատարման կարևորությունը: Պարոն Պուտինը դա հնարավոր է համարում, սակայն, որքան ես հասկացա,մեծ հույսեր դրա հետ չի կապում: Հնարավոր է, որ դա պայմանավորված է կողմերի միջև առկա հարաբերություններով»,- խոստովանել էր Էրդողանը:
