Ադրբեջանի և Թուրքիայի միջև առևտրաշրջանառությունը 2017-ին 2016 թվականի համեմատ ավելացել է 12%-ով՝ հասնելով 2.6 մլրդ ամերիկյան դոլարի: Այսպիսի հայտարարությամբ է հանդես եկել Ադրբեջանի էկոնոմիկայի փոխնախարար Նիյազի Սաֆարովը Բաքվում «Նոր հորիզոններ Թուրքիա-Ադրբեջան տնտեսական համագործակցության համար» խորագրով սիմպոզիումի ժամանակ:Սաֆարովը շեշտել է, որ համագործակցության մեջ մեծ ներդրում է ադրբեջանական պետական նավթային ընկերության կողմից Թուրքիայում կառուցած մեծ նավթամշակման գործարանը, որի կառուցման համար ներդրվել է 6.5 մլրդ դոլար: Ադրբեջանցի փոխնախարարը տեղեկացրել է նաև, որ այդ երկրի արտահանումը Թուրքիա աճել է 18, իսկ Թուրքիայից ներմուծումը՝ 25 տոկոսով:«Ադրբեջանը մինչ օրս Թուրքիայում 14.5 մլրդ դոլարի ներդրում է կատարել, իսկ Թուրքիան Ադրբեջանում ներդրել է 11.8 մլրդ դոլար: Ադրբեջանում գործունեություն է ծավալում 3400 թուրքական ընկերություն, իսկ Թուրքիայում՝ 2400 ադրբեջանական: Թուրքական ընկերությունները ակտիվ մասնակցություն են ցուցաբերում պետության հայտարարծ մրցույթներին, որոնց ծավալը կազմում է 15 մլրդ դոլար»,-ասել է Սաֆարովը:Սիմպոզիումին մասնակցող Ադրբեջանում Թուրքիայի դեսպան Էրքան Օզորալն էլ նշել է, որ Թուրքիան, նավթային ոլորտը չհաշված, Ադրբեջանում ամենամեծ ծավալով ներդրում կատարած պետությունն է, իսկ նավթային ոլորտում՝ ամենաշատ ներդրում կատարած երկրներից մեկը:
