ՀԱՊԿ գլխավոր քարտուղարի նշանակման հարցից բացի ավելի լուրջ պրոբլեմներ կան: Այս մասին քվեարկությունից հետո հայտարարեց ՀՀ վարչապետի պաշտոնակատար Նիկոլ Փաշինյանը՝ անդրադառնալով հարցին՝ արդյոք կողմ է, որ ՀԱՊԿ գլխավոր քարտուղարի պաշտոնը ստանձնի Բելառուսի ներկայացուցիչը: «Հայաստանն իր դիրքորոշումը հայտնել է: Ես ասել եմ, որ գլխավոր քարտուղարի պաշտոնն ամենակարեւոր հարցը չէ, որովհետեւ Հայաստանի պաշտոնավարման ժամկետը, այսպես թե այնպես, պետք է սպառվի: Ենթադրենք հիմա Խաչատուրովն է, 2020 թ-ին էլ նա չի: Դա՞ է պորբլեմը. դա չի պրոբլեմը, շատ ավելի լուրջ պրոբլեմներ կան ու դրանք քննարկվում են եւ ԵԱՏՄ տնտեսական խորհրդի վերջին նիստում էլ լուրջ ձեւով քննարկվել են», - ասել է նա: Նա նաեւ նշեց, որ ՀԱՊԿ գլխավոր քարտուղարի նշանակման հարցով դեռեւս որոշում կայացրած չէ: «Որեւէ որոշման չենք հանգել: ՀԱՊԿ-ում որոշումներն ընդունվում են կոնսենսուսով, իսկ ՀԱՊԿ նիստ դեռ չի եղել: Դրանով ամեն ինչ ասված է», - ասաց Փաշինյանը: Նիկոլ Փաշինյանը, պատասխանելով հարցին, ասաց, որ քվեարկել է հանուն ազատ եւ երջանիկ Հայաստանի: Հարցին էլ, թե որ ուժերի հետ կոալիցիա կկազմեն, վարչապետի պաշտոնակատարն ասաց. «Սոցիոլոգիական հարցումներն արտահայտում են ժողովրդի կամքն ու պատկերացումները, այսինքն, կոալիցիա չի լինի»:
