Ռուսաստանցիները պետք է հստակ հասկանան, որ Վրաստան մեկնելն իրենց համար անվտանգ չէ։ Ինչպես հաղորդում է ՏԱՍՍ-ը, այս մասին հայտարարել է ՌԴ նախագահի մամուլի քարտուղար Դմիտրի Պեսկովը այն միջադեպից հետո, որը մեկ օր առաջ տեղի էր ունեցել հեռուստահաղորդավար Վլադիմիր Պոզների հետ Թբիլիսիում: «Վրաստանում վտանգավոր է Ռուսաստանի քաղաքացիների համար։ Այնտեղ պարզապես վտանգավոր է մեկնել: Դա պետք է ռուսաստանցիները հստակ հասկանան», - ընդգծել է Պեսկովը՝ նշելով, որ Կրեմլը վճռականորեն դատապարտում է ծայրահեղական տրամադրված ազգայնականների ագրեսիվ գործողությունները Վրաստանի մայրաքաղաքում Ռուսաստանի քաղաքացիների նկատմամբ: Պեսկովը հավելել է, որ Ռուսաստանը ողջունում է Վրաստանի վարչապետ Իրակլի Ղարիբաշվիլիի հայտարարությունը, որը դատապարտել է ազգայնականների գործողությունները: «Մենք տեսել ենք Վրաստանի վարչապետի այսօրվա հայտարարությունը, որը նույնպես դատապարտել է այդ գործողությունները, եւ մենք ողջունում ենք այդ հայտարարությունը»,-ասել է Կրեմլի ներկայացուցիչը: Ինչպես ավելի վաղ հայտնել էր VERELQ-ը, Պոզները Թբիլիսի էր ժամանել մարտի 31-ին՝ ծննդյան օրը նշելու համար, ապրիլի 1-ին լրանում է նրա 87-ամյակը: ԶԼՄ-ների հաղորդմամբ, նրան ուղեկցել են ավելի քան 40 մարդ՝ ընկերներն ու գործընկերները։ Լրագրողը ծրագրում էր երեք օր մնալ Վրաստանում։ Սակայն բողոքի ակցիաների պատճառով նա ստիպված է եղել ոստիկանության պաշտպանության ներքո հեռանալ երկրից։