Ընդդիմադիր Հայ հեղափոխական Դաշնակցություն կուսակցության անդամները բողոքի ակցիա են իրականացնում ՀՀ Անվտանգության խորհրդի շենքի դիմաց: Նրանց զայրացրել է ԱԽ քարտուղար Արմեն Գրիգորյանի՝ «Թուրքիայի նկատմամբ Հայաստանի մոտեցումների շտկման» մասին հայտարարությունը: «Անվտանգության խորհդուրդն իր քարտուղարով դարձել է Հայաստանում Թուրքիայի դեսպանատուն, իսկ ԱԽ քարտուղար Արմեն Գրիգորյանն այլեւս հանգիստ կարող է ասել, որ ՀՀ-ում Թուրքիայի դեսպանն է», - հայտարարեց ՀՅԴ անդամ Գեղամ Մանուկյանը: Բողոքի ակցիայի մասնակիցները նշում են՝ Անվտանգության խորհրդի քարտուղար Արմեն Գրիգորյանը Հանրային հեռուստաընկերության եթերում 3 անգամ չպատասխանեց հարցին՝ Թուրքիան Հայաստանի թշնամի՞ն է, թե՞ ոչ։ Օրերս ՀՀ Անվտանգության խորհրդի քարտուղար Արմեն Գրիգորյանը Հանրային հեռուստաընկերության եթերում լրագրողի հարցին, թե արդյոք Հայաստանը Թուրքիային համարու՞մ է թշնամի պետություն, ասել էր. «մեր մոտեցումներում պետք է որոշակի շտկումներ լինեն»:
