Զախարովան՝ Ադրբեջանի և Նախիջևանի միջև ճանապարհի նկատմամբ Հայաստանի վերահսկողության մասին

Միջազգային հաղորդակցություններով փոխադրումները, որոնք պետք է միացնեն Ադրբեջանը Նախիջևանի հետ, կիրականացվեն միջազգային համաձայնագրերի և Հայաստանի ազգային օրենսդրության հիման վրա։ Այս մասին հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան նոյեմբերի 25-ին կայացած ճեպազրույցի ժամանակ։

«Ինչպես գիտեք, մենք հանդես ենք գալիս 2020 թվականի նոյեմբերի 9-ին և ընթացիկ տարվա հունվարի 11-ին, բարձր մակարդակով ձեռք բերված պայմանավորվածությունների հետեւողական իրականացման օգտին, որոնք վերաբերում են նաեւ Հարավային Կովկասում տնտեսական եւ տրանսպորտային կապերի ապաշրջափակմանը։

Այս կարևոր խնդրի լուծմամբ երեք երկրների փոխվարչապետների համանախագահությամբ զբաղվում է եռակողմ աշխատանքային խումբը։ Դե, ըստ էության, այդ հարցերի ամբողջ համալիրը քննարկել է մեր երկրի կառավարության փոխնախագահ Ալեքսեյ Օվերչուկը Երեւան եւ Բաքու կատարած իր այցի ժամանակ։ Մենք լավ հեռանկարներ ենք տեսնում տարածաշրջանում տրանսպորտային կապերի ապաշրջափակման շուրջ պայմանավորվածությունների հասնելու համար՝ հաշվի առնելով, իհարկե, բոլոր կողմերի շահերի հավասարակշռությունը։

Մենք նաև ելնում ենք նրանից, որ միջազգային փոխադրումներն ապաշրջափակված երթուղիներով իրականացվելու են միջազգային համաձայնագրերի և կողմերից յուրաքանչյուրի ազգային օրենսդրության հիման վրա», - հայտարարել է Զախարովան ճեպազրույցի ժամանակ՝ պատասխանելով VERELQ-ի հարցին։