Սերժ Սարգսյանի դեմ մեղադրանքները հանրության ուշադրությունը շեղելու փորձ են. Շարմազանով
Երրորդ նախագահ Սերժ Սարգսյանի դեմ մեղադրանքները հերթական շինծու գործն են, խղճուկ կապիտուլյանտների հերթական քայլը։ Այս մասին այսօր՝ նոյեմբերի 22-ին, հայտարարել է նախկին իշխող Հանրապետական կուսակցության անդամ Էդուարդ Շարմազանովը։
Նրա խոսքով՝ երրորդ նախագահի դեմ գործողությունները հետևանք են գործող իշխանության ձգտման այն դավաճանական և վտանգավոր գործընթացների, որոնք տեղի են ունենում Սյունիքում։ «Սա շինծու գործ է։ Սերժ Սարգսյանը չի վախենում ոչ բերման ենթարկելուց, ոչ ձերբակալությունից, ոչ էլ նույնիսկ կալանքից», - հայտարարեց Շարմազանովը։
Նա ընդգծել է, որ ներկա գործընթացները ցույց են տալիս, որ իշխանությունները չեն կարողանում ապահովել հայկական կողմի շահերից բխող լուծումները: «Գործող իշխանությունն առաջնորդվում է թուրք-ադրբեջանական օրակարգով։ Եվ նախագահի դեմ շինծու մեղադրանքները դրա հերթական ապացույցն են», - հայտարարել է Շարմազանովը։
VERELQ հայտնել է, որ ՀՀ երրորդ նախագահ Սերժ Սարգսյանը հարցաքննության է կանչվել որպես մեղադրյալ: Նրա փաստաբանը համարում է սա քաղաքական հետապնդում, իսկ հարուցած գործը՝ «իրավական խայտառակություն»: