«Գերիներին վերադարձնելու համար մեկ ժամ» Բաքվին տալուց հետո 144 ժամ է անցել. Զոհրաբյան

Ընդդիմադիր պատգամավոր, «Բարգավաճ Հայաստան» խմբակցության անդամ Նաիրա Զոհրաբյանն այսօր՝ հունիսի 4-ին, խորհրդարանում բարձրացրել է Ադրբեջանում հայ ռազմագերիների նկատմամբ իրականացվող դատաստանի հարցը:

«Հունիսի 1-ին Բաքվի ծանր հանցագործությունների դատարանը ավարտել է 14 հայ ռազմագերիների դեմ մեղադրանքի նախնական քննարկումը։ Նրանց մեղադրում են «ահաբեկչության», «Ադրբեջանի տարածքում հանցավոր գործունեության» մեջ՝ «պայթյունների, հրդեհների եւ մարդկանց կյանքի համար այլ վտանգավոր ծրագրված ահաբեկչական գործողությունների» կազմակերպման մեջ:

Ուզում եմ հիշեցնել, որ խոսքը դեկտեմբերին Հադրութում գերեվարված 14 մեր տղաների մասին է։ Խոսքը ռազմագերիների մասին է, որոնց, չնայած միջազգային հանրության տոտալ ճնշումներին, Ադրբեջանը հրաժարվում է ռազմագերի համարել եւ արդեն քրեական հետապնդում է սկսվել նրանց նկատմամբ», - հայտարարել է Զոհրաբյանը։

Նա ընդգծել է, որ ադրբեջանական կողմից պահվող մյուս հայ ռազմագերիների նկատմամբ նույնպես քրեական գործեր են հարուցվել:

«Ուզում եմ հիշեցնել, որ ՀՀ ԶՈՒ գլխավոր շտաբի պատասխանատուները հայտարարել են, որ ադրբեջանական կողմին մեկ ժամ է տրվել օրեր առաջ գերեվարված մեր տղաներին վերադարձնելու համար։ Ուզում եմ նաև հիշեցնել, որ այս հայտարարությունից 144 ժամ է անցել, իսկ մեր տղաները դեռ մնում են գերության մեջ։

Օրերս Մոսկվայից վերադարձել է հայկական պատվիրակությունը, որը պետք է բանակցություններ վարեր սահմանին բախումների և անցած շաբաթ գերեվարված զինծառայողներին վերադարձնելու հարցերի շուրջ։ Պատվիրակությունը, ըստ էության, վերադարձել է ոչնչով։ Բանակցությունների արդյունքում տարածվեց լղոզված հայտարարություն, որում միայն նշվում էր բանակցությունները շարունակելու մասին», - եզրափակեց պատգամավորը։