Հայաստանը Ադրբեջան է արտահանել ալյումինե փայլաթիթեղ. Գևորգ Պապոյան

Ադրբեջանական ապրանքների բազմամիլիոնանոց ներմուծումից հետո Հայաստանը մեկնարկել է հանդիպակաց առևտուրը՝ հարևան երկիր ուղարկելով սեփական արտադրանքի առաջին խմբաքանակը՝ ալյումինե փայլաթիթեղ։

Այս մասին սեպտեմբերի 24-ին կառավարության նիստից հետո լրագրողների հետ ճեպազրույցում հայտարարեց ՀՀ էկոնոմիկայի նախարար Գևորգ Պապոյանը։ Պաշտոնյան չբացահայտեց գործարքի ֆինանսական մանրամասներն ու ծավալները՝ խոստանալով այդ տվյալները տրամադրել ավելի ուշ։ «Հայաստանը Ադրբեջան է արտահանել ալյումինե փայլաթիթեղ», - լրագրողներին հաստատեց տնտեսական գերատեսչության ղեկավարը:

Այս քայլը տրամաբանական շարունակությունն է օգոստոսի 31-ին արտգործնախարար Արարատ Միրզոյանի հնչեցրած հայտարարության, որով ազդարարվում էր հայ-ադրբեջանական առևտրի շուտափույթ անցումը երկկողմ ձևաչափի։

Մինչ վերջերս տնտեսական կապերը խիստ ասիմետրիկ բնույթ էին կրում։ 2026 թվականի առաջին կիսամյակի պաշտոնական մաքսային վիճակագրության համաձայն՝ Ադրբեջանից Հայաստան ներմուծման ծավալը կազմել է 17,9 մլն դոլար, մինչդեռ հայկական արտահանումը հակառակ ուղղությամբ գնահատվում էր ընդամենը 960 դոլար։

Երկու երկրների միջև առևտրային հարաբերությունների էական ակտիվացում գրանցվեց 2025 թվականի դեկտեմբերին, երբ Վրաստանի տարածքով Հայաստան ժամանեց ադրբեջանական SOCAR պետական ընկերության մոտ 1300 տոննա բենզինով բեռնված 22 վագոնից բաղկացած գնացքը։

Այժմ հակառակ ուղղությամբ կոմերցիոն մատակարարումների մեկնարկի մասին հայկական իշխանությունների հայտարարությունները ստացան իրենց փաստացի հաստատումը: