Որևէ միջանցքի մասին խոսք լինել չի կարող. Սերժ Սարգսյան

Մենք չենք կարող միջանցք տալ որևէ մեկին։ Ո՞նց կարող ենք միջանցք տալ կամ ինչի՞ համար միջանցք տանք: Այս մասին Մասիսում «Պատիվ ունեմ» դաշինքի համակիրների հետ հանդիպմանը հայտարարել է ՀՀ երրորդ նախագահ, ՀՀԿ նախագահ Սերժ Սարգսյանը։

Նա նշել է, որ տեղյակ չէ այդ միջանցքից, բայց մեկ բան հստակ է՝ ինքը դեմ է որևէ միջանցք տալուն.  

«Այն, որ պիտի տարածաշրջանում այդ կոմունիկացիաները բացվեն, այդտեղ խնդիր չկա, բայց ի՞նչ միջանքի մասին է խոսքը: Այսինքն՝ մենք պարտավո՞ր ենք իրենց միջանցք տալ, ո՞ր թղթով, ո՞ր պայմանավորվածությամբ, ինչի՞ համար»,- հարցադրումներ է հնչեցրել նախկին նախագահը։

Սերժ Սարգսյանը, կրկնելով, որ ինքը պայմանավորվածության մասին տեղյակ չէ, ընդգծել է՝ եթե սրանց ճանապարհենք, որևէ իշխանություն չի մտածի ինչ-որ միջանցքի մասին։

«Միջանցքի մասին խոսք լինել չի կարող: Ինչպե՞ս կարող ենք մեր տարածքից ինչ-որ մի հատված առանձնացնել, ասել՝ այս հատվածը տալիս ենք էս մեկի վերահսկողության տակ. բացառված է»,- հավելել է նա։