Սյունիքում անհրաժեշտ է ձևավորել անվտանգության գոտի. Արման Թաթոյան

Սյունիքում անհրաժեշտ է ձևավորել անվտանգության գոտի։ Այս մասին այսօր՝ ապրիլի 30-ին, լրագրողների հետ զրույցում ասաց Մարդու իրավունքների պաշտպան Արման Թաթոյանը։

Նրա խոսքով՝ դա թույլ կտա ոչ միայն վերականգնել սահմանամերձ շրջաններում բնակվող Հայաստանի քաղաքացիների ոտնահարված իրավունքները, այդ թվում՝ սոցիալ-տնտեսական բնույթի իրավունքները՝ արոտավայրերի օգտագործման իրավունք, հողի մշակման իրավունք և այլն:

«Դա ենթադրում է, որ Ադրբեջանի զինծառայողները, զինված մարդիկ, ադրբեջանական դրոշներն ու նշանները պետք է հեռացվեն այդ տարածքներից, որպեսզի ապահովեն մեր քաղաքացիների բնականոն կյանքը, քանի որ այդ դրոշներն ու նշանները նույնպես հանդիսանում են բնակչության ահաբեկման ատրիբուտներ, ինչպես նաև ադրբեջանցի զինվորականների տեղակայումն ապահովելու առիթ», - նշել է նա:

Թաթոյանը նշել է, որ ադրբեջանցի զինվորականների ներկայության պատճառով շատ բնակիչներ խուսափում են օգտագործել Գորիս-Շուռնուխ, Կապան-Չաքաթեն-Սրաշեն-Շիկահող ճանապարհները, հատկապես գիշերային ժամերին: Թաթոյանը նշել է, որ ստեղծված հետպատերազմյան իրողությունների վերլուծությունը ներկայացրել է միջազգային կառույցներին եւ առաջարկել խնդրի լուծման այդ տարբերակը:

«Մենք ականատես եղանք հովվին բռնելու և ծեծելու, շատ դեպքեր եղան, երբ խոշոր եղջերավոր անասուններն անցնում էին իրենց տարածք և հետ վերադարձնելու հնարավորություն չեղավ», - ասաց նա:

Օմբուդսմենը շեշտել է, որ Հայաստանի եւ Ադրբեջանի միջեւ երբեք սահմանազատում չի իրականացվել։ «Սահմանների որոշման հիմքում պետք է լինեն մարդու իրավունքները», - հայտարարել է նա:

Թաթոյանը նշել է, որ ադրբեջանական զորքերը Սյունիքում են հայտնվել Ադրբեջանի վարած ցեղասպան քաղաքականության և ռազմական ագրեսիայի արդյունքում: «Ինձ ոչ ոք չի կարող համոզել, որ ստեղծված իրավիճակը նորմալ է մարդու իրավունքների տեսանկյունից», - հայտարարել է նա:

Թաթոյանը նշել է, որ անվտանգության գոտի ստեղծելու առաջարկն ուղարկվել է նաեւ համապատասխան պետական կառույցներ: Սակայն Թաթոյանն ինքը շեշտը դնում է հենց միջազգային կառույցների վրա։