Բայդենի կողմից Ցեղասպանության ճանաչումից հետո կաճի արդյոք Թուրքիայի ագրեսիան ՀՀ-ի նկատմամբ

Շատ է հնչում այն հարցը, թե արդյո՞ք Բայդենի ճանաչման արդյունքում Թուրքիան առավել կագրեսիվանա Հայաստանի նկատմամբ: Այդ հարցին պատասխանել է Ամերիկայի հարցերով փորձագետ, քաղաքագետ Սուրեն Սարգսյանը:

Նա կարծում է, որ ոչ: «Թուրքիան կարող է ագրեսիվանալ առանց որևէ առիթի: 44 օրյա պատերազմը ձեզ օրինակ: Լիբիան, Սիրիան, Իրաքը, Կիպրոսն ու Հունաստանը ձեզ օրինակ: Այնպես որ որևէ առիթ Թուրքիային պետք չէ հարձակում գործելու համար որևէ պետության դեմ: Ինքն իր հաշվարկն ունի, իր շահերն ունի ու իր մասշտաբային ինքնուրույնությունը», - գրել է Սարգսյանը ֆեյսբուքյան իր էջում:

Հետո, Հայաստանն ի՞նչ կապ ունի Բայդենի ճանաչման հետ, հարց է հնչեցրել քաղաքագետնն ու ինքն է պատասխանել. «Բայդենը խոստացել է իր քաղաքացիներին՝ ամերիկահայերին, իրեն ընտրել են, ինքն էլ խոստումը կատարել է: Հայաստանին չի խոստացել: Այնպես, որ եթե կարող է թող ԱՄՆ-ի դեմ ագրեսիվանա»:

Նրա խոսքով, ամերիկացիները կառավարեցին շոկը: «Այսինքն այնպես արեցին, որ որոշումը Թուրքիայի համար շոկային չլինի: Շոկը կարող է անկառավարելի հետևանքներ առաջացնել: Դրա համար երկու շաբաթ առաջ ողջ ամերիկյան մամուլը հեղեղված էր տեղկություններով ճանաչման վերաբերյալ», - նկատել է նա:

Ավելին, գրել է Սարգսյանը, Բայդենը մեկ օր առաջ զանգեց և տեղեկացրեց Էրդողանին իր որոշման մասին: «Կարծում եմ դրա համար էլ Թուրքիայի արձագանքը շատ կոշտ չէր: Միաժամանակ կոշտ չարձագանքեցին, որ ներքին լսարանի համար չկարևորեն տեղի ունեցածը: Այսինքն ճանաչման փաստին անլուրջ վերաբերեն: Նույնիսկ դեսպանին դեռ հետ չեն կանչել, ինչպես ամեն անգամ անում են», - նշել է Սուրեն Սարգսյանը:

VERELQ-ը հիշեցնում է, որ ապրիլի 24-ին ԱՄՆ նախագահ Ջո Բայդենը 20-րդ դարասկզբի իրադարձություններն անվանել է Հայոց ցեղասպանություն։ Պետության ղեկավարի պաշտոնում Բայդենի նախորդները խուսափել են այդ տերմինի օգտագործումից։

Մինչդեռ Թուրքիայի ԱԳՆ-ն հայտարարել է, որ Բայդենի հայտարարությունը խարխլում է Վաշինգտոնի եւ Անկարայի միջեւ հարաբերությունները եւ կոչ է արել ԱՄՆ նախագահին «շտկել այդ լուրջ սխալը»: ՀՀ վարչապետ Նիկոլ Փաշինյանը Միացյալ Նահանգների կողմից Հայոց ցեղասպանության ճանաչումն անհրաժեշտ ուղերձ է համարել միջազգային հանրությանը: