Մանկամտություն է կարծել, թե ՌԴ-ն ու Թուրքիան գնում են ռազմավարական մերձեցման. փորձագետ

2007 թ. նոյեմբերին Ախալքալաքից դուրս բերված ռուսական 62-րդ ռազմական բազայի տեղում այժմ սկսվել են թուրքական բազայի ձևավորման աշխատանքները: Թուրքական ընկերություններն արդեն լծվել են ենթակառուցվածքային արդիականացման գործին: Այս մասին Facebook-ի իր էջում գրել է Էներգետիկ անվտանգության ինստիտուտի ղեկավար, էներգետիկ անվտանգության փորձագետ Վահե Դավթյանը:

"Հայաստանի դավաճանական իշխանության կողմից շրջանառության մեջ դրված՝ Թուրքիայի հետ բարեկամանալու մասին թեզը պետք է դիտարկել բացառապես տարածաշրջանի թրքացման ու Մոսկվայի դուրս մղման համատեքստում: Մանկամտություն է կարծել, թե Ռուսաստանն ու Թուրքիան գնում են ռազմավարական մերձեցման: Ռուս-թուրքական հարաբերությունները բազմաշերտ են, բազմավեկտոր ու պատմականորեն չափազանց բարդ: Դրանց մակերեսային ու միակողմանի ընկալումը թույլ չի տալու մեզ ապագայում ճիշտ դիրքավորվել տարածաշրջանային նոր ճարտարապետության մեջ:

"Ազգային ապագա" վանկարկումների ներքո Հայաստանից ռուսական 102-րդ բազայի դուրս բերման համար պայքարող ուժերը կամ չեն պատկերացնում տարածաշրջանային աշխարհաքաղաքական անատոմիան կամ էլ միտումնավոր ջուր են լցնում թրքահպատակ իշխանության ջրաղացին",- գրել է նա: