Հայաստանը պետք է հստակ դիրքորոշում հայտնի այն երկրների նկատմամբ, որոնք միակողմանի դիրքորոշում են ցուցաբերել Արցախի դեմ ադրբեջանա-թուրքական ագրեսիայի ընթացքում։ Այս մասին այսօր՝ մարտի 29-ին, ԱԺ արտաքին հարաբերությունների հանձնաժողովի նիստում հայտարարեց պատգամավոր Շիրակ Թորոսյանը։
Պատգամավորը համոզված է, որ Հայաստանը պետք է ավելի սերտորեն համագործակցի այն երկրների հետ, որոնք ունեն խնդիրներ Թուրքիայի հետ, ինչպիսիք են Հունաստանը եւ Կիպրոսը, Սիրիան և Իրաքը։ Նրա խոսքով, անշուշտ, Հայաստանը պետք է ձգտի հարևանների հետ խաղաղ գոյակցությանը և տարածաշրջանում կայունության ու խաղաղության ապահովմանը: Այնուամենայնիվ, շարունակեց պատգամավորը, անհրաժեշտ է նաև հաշվի առնել այս փուլում ձևավորված պատմական արմատներ ունեցող իրողությունները։
Հայաստանի շուրջ անվտանգ միջավայր ձեւավորելու տեսանկյունից, շարունակեց պատգամավորը, Հայաստանը պետք է «նոր տիպի» գործողություններ ձեռնարկի, որպեսզի ապահովի իր կայացումը՝ որպես տարածաշրջանային երկիր։ «Փորձը ցույց է տալիս, որ մենք ստիպված ենք լինում դիմել այն ուժերին, որոնք իրականում կարող են դեր խաղալ, բայց կանեն արդյոք դա, մեծապես կախված է նրանց շահերից», - հայտարարել է նա: Պատգամավորը նշեց, որ տարածաշրջանում կան երկրներ, որոնց շահերը համընկնում են Հայաստանի շահերի հետ:
Թորոսյանը նաեւ հավելել է, որ որոշ երկրների հետ պետք է վերանայել հարաբերությունները: «Կան երկրներ, որոնց հետ հարաբերություններ հաստատելը մեզ ավելորդ ոգևորել է։ Չեմ ասի բոլորին անուն առ անուն, բայց Իսրայելը կնշեմ։ Մենք ոգևորվել էինք դիվանագիտական հարաբերությունների հաստատմանը եւ այդ երկրի հետ, սակայն բոլորս էլ տեսել ենք, թե ինչպիսի դիրքորոշում ընդունել է Իսրայելը պատերազմից առաջ, ընթացքում և հետո: Ես կարծում եմ, որ մենք պետք է արտահայտենք ավելի հստակ դիրքորոշում նման դեպքերում», - հայտարարել է նա:
Ի պատասխան ՀՀ ԱԳ նախարար Արա Այվազյանը նշել է, որ Հայաստանն, անշուշտ, շահագրգռված է զարգացնելու համագործակցությունը այն երկրների հետ, որոնց մասին խոսել է պատգամավորը։ Դրա հետ մեկտեղ Այվազյանը նշել է, որ Հայաստանը, ինչպես ոչ ոք, գիտի խաղաղության գինը, ուստի մտադիր չէ թշնամիներ փնտրել եւ կանի իրենից կախված ամեն ինչ, որպեսզի տարածաշրջանում կայուն եւ անվտանգ մթնոլորտ հաստատվի:
«Տեղի ունեցած իրադարձությունների լույսի ներքո արտաքին քաղաքականությունը լինելու է առավել քան երբեւէ պրագմատիկ եւ ճկուն։ Նոր դաշնակիցներ ձեռք բերելով՝ մենք պետք է ընդհանուր ըմբռնում ունենանք բոլոր այն մարտահրավերների ու սպառնալիքների վերաբերյալ, որոնք թելադրված են ներկայիս իրավիճակով», - հայտարարել է նա։ Խոսելով Իսրայելի մասին՝ նախարարը նշել է. «Ինչ վերաբերում է Ձեր նշած երկրին, ապա այն ոչ միայն տարածաշրջանային, այլեւ ավելի լայն գործոն է, որը մենք չենք կարող անտեսել»:
