19.03.2024
Մամուլ. Հայկ Սարգսյանի Իրան մեկնելը կապ ունի՞ կորած ինքնաթիռի հետ
prev Նախորդ նորություն

Նորություններ գործընկերներից

Մամուլ. ԲՀԿ-ում սպասում էին «շեֆից» լուրի

VERELQ-ը ներկայացնում է հայաստանյան մամուլի ամենաուշագրավ հրապարակումները:


«Հրապարակ» թերթը գրում է. «ԲՀԿ-ում երեկ լարված ու սպասողական տրամադրություններ էին։ Պատգամավորները, մամուլից եւ «Իմ քայլը» խմբակցության ղեկավար Մակունցից տեղեկանալով, որ արտահերթ ընտրությունների հարցով սպասվում է Գագիկ Ծառուկյան-Նիկոլ Փաշինյան հանդիպում, «շեֆից» լուրի էին սպասում՝ կստորագրի՞ Փաշինյանի առաջարկած հուշագիրը, թե՞ կշարունակի պայքարը ՀՓՇ-ի հետ՝ փողոցում։ Երեկ անգամ լուրեր տարածվեցին, որ պատգամավորներին Ծառուկյանը կանչել է հանդիպման եւ դրանից հետո է գնալու Փաշինյանի հետ հանդիպման, սակայն հանդիպումը չէր կայացել, պատգամավորներին էլ փոխանցել են, որ առաջիկա օրերին կհավաքվեն»:


«Ժողովուրդ» օրաթերթը գրում է. Իշխանությունները դեռ 44-օրյա պատերազմից առաջ փոխմարզպետների հաստիքը ավելացրին եւս մեկով։ Նոր հաստիքում նշանակված փոխմարզպետները պետք է համակարգեին աշխարհազորայինների աշխատանքը, եւ նշանակվեցին հենց զինվորականներ։ Սակայն հիմա՝ պատերազմից հետո, այդ պաշտոնում նշանակված զինվորականները մեկը մյուսի հետեւից հրաժարվում են պաշտոնից եւ կանգնում Գլխավոր շտաբի կողքին։ Հիշեցնենք՝ Օնիկ Գասպարյանը, եւս 40 գեներալներ ու գնդապետեր պահանջում են Նիկոլ Փաշինյանի հրաժարականը։ Երեկ Վայոց ձորի մարզպետի տեղակալ, պահեստազորի գնդապետ Արայիկ Մուրադյանը հայտարարություն էր տարածել, որ մասնակից լինելով պետականաշինության գործին, անընդունելի համարելով երկրում ստեղծված իրավիճակը՝ հրաժարվում է Վայոց ձորի մարզպետի տեղակալ-աշխարհազորային զորամիավորման ղեկավարի (հրամանատարի) պաշտոնից։  Վարչապետ Նիկոլ Փաշինյանն արդեն ստորագրել է Արմավիրի մարզպետի տեղակալ Ալեքսան Ալեքսանյանի եւ Գեղարքունիքի մարզպետի տեղակալ Հենրիկ Մուրադյանի՝ աշխատանքից ազատվելու դիմումները։ Փոխմարզպետ է նաեւ Ռազմիկ Պետրոսյանը, սակայն նա աջակցում է իշխանություններին։


«Հրապարակ» թերթը գրում է. «Խորհրդարանական մեծամասնությունը երեկ տապալեց վճռաբեկ դատարանի դատավորի թեկնածուների ընտրությունը: Բարձրագույն դատական խորհուրդն առաջադրել էր Սամվել Գրիգորյանի, Արմեն Հայկյանցի եւ Արսեն Մկրտչյանի թեկնածությունները։ Սյունիքի մարզի դատարանի նախագահ Սամվել Գրիգորյանն ինքնաբացարկի դիմում էր ներկայացրել, պատգամավորները պետք է ընտրություն կատարեին մյուս երկու թեկնածուների միջեւ: Սակայն անցած երկու օրերին իմքայլականները քննարկեցին ոչ թե թեկնածուներին, այլ՝ ԱԺ-ում նրանց ներկայացրած ԲԴԽ նախագահ Ռուբեն Վարդազարյանի հարցը։ Իսկ «Իմ քայլը» խմբակցության ղեկավար Լիլիթ Մակունցը հայտարարեց` չեն ընտրելու ներկայացված թեկնածուներից ոչ մեկին: «Այս քայլով «Իմ քայլը» խմբակցությունը դիրքորոշում է հայտնելու ոչ թե թեկնածուների նկատմամբ, որոնց մեծագույն ակնածանքով ենք վերաբերվում, այլ որպես վերաբերմունք ԲԴԽ նախագահի գործունեության եւ հայտարարությունների վերաբերյալ»,- ասաց նա: Ընտրությանը իշխող խմբակցությունը չմասնակցեց։ Առնվազն ծիծաղելի է, երբ դատական իշխանությունը բարեփոխելուց, դատարանների ծանրաբեռնվածությունը բեռնաթափելուց, դատական անկախությունից խոսող իշխանությունը ԲԴԽ նախագահի «ինադու» չի համալրում վճռաբեկ դատարանի կազմը։ Այս իշխանությունների կողմից պետական ինստիտուտները կազմաքանդելու աղետալի գործելաոճը նորանոր դրսեւորումներ է ստանում»:


«Իրավունք» օրաթերթը գրում է. «Վերջին շրջանում ասեկոսեներ են շրջանառվում, որ իմքայլական պատգամավոր Հայկ Սարգսյանը, որը հանրության շրջանում առավել հայտնի է «Շիշ բռնող» մականվամբ, շատ է սի­րում գիշերային կյանք վարել ու զվար­ճանալ: Դեռ ամիսներ առաջ՝ պատերազմի ամենաթեժ պահին, համացանցում հայտնվեցին լուսանկարներ, որում հստակ երեւում է, թե ինչպես է պատգա­մավորը գիշերային ակումբում կիսա­մերկ աղջիկների հետ զվարճանում: Օդում կախ­ված լուրերի համաձայն՝ Նիկոլ Փաշինյանի ական­ջին հասել են պատգամավո­րի սեռաքաղց գործողությունները, ին­չից հետո Նիկոլը սաստել է պատգամավորին, որպեսզի վերջինս հնարավորինս քիչ զվարճանքներին տրվի, քանի որ խայտառակում է իմքայլականների անունն ու պատիվը":


«Հրապարակ» թերթը գրում է. «Ազգային անվտանգության ծառայությունը հանրային քննարկման է դրել նախագիծ, որով առաջարկվում է պետական պահպանության ծառայությանը տալ վարչապետին ենթակա մարմնի կարգավիճակ՝ այն դուրս բերելով ԱԱԾ մարմինների համակարգից: Սա այն ծառայությունն է, որն ապահովում է վարչապետի եւ նրա ընտանիքի անվտանգությունը։ Պահպանության ծառայության հիմնական նպատակներն ու խնդիրներն են՝ «պետական պահպանության օբյեկտներին սպառնացող վտանգը կանխատեսելը եւ բացահայտելը, սպառնալիքների կանխարգելման համար համալիր միջոցառումներ իրականացնելը» եւ այլն։ Տպավորություն է, որ Նիկոլ Փաշինյանը չի վստահում ԱԱԾ-ին եւ սեփական պահպանությունը որոշել է իր ենթակայության տակ վերցնել»:


«Հրապարակ» թերթը գրում է. «Պատերազմից 4 ամիս անց իշխանական վերնախավից շատ քչերն են Արցախ ոտք դրել։ Ինքը՝ վարչապետ Նիկոլ Փաշինյանը, որը հատկապես որդու ծառայության երկու տարիների ընթացքում հաճախակի էր ընտանյոք հանդերձ ուղղաթիռով Արցախ մեկնում, ապա արդարանում, որ եթե ուղղաթիռը չշահագործվի, տեխնիկական խնդիրներ կառաջանան։ Վերջին ամիսներին Արցախ են մեկնել էկոնոմիկայի նորանշանակ նախարար Վահան Քերոբյանը, ԿԳՄՍ նախարար Վահրամ Դումանյանը, պաշտպանության նախարար Վաղարշակ Հարությունյանը, որոնք պատերազմից հետո են նշանակվել։ Արցախ այցելել են նաեւ գլխավոր դատախազ Արթուր Դավթյանը, արդարադատության նախարար Ռուստամ Բադասյանը եւ մեկ-երկու պատգամավոր, «Իմ քայլից»՝ Նազելի Բաղդասարյանը, ով զբաղվում է Շիրակի մարզի գերիների հարցով։ Մի կողմից՝ Փաշինյանն ու իր թիմը «երես չունեն», որ Արցախ մեկնեն, մյուս կողմից՝ լավ են հասկանում, որ Արցախում իրենց, մեղմ ասած, չեն սպասում»:


«Առավոտ» օրաթերթը գրում է. «Հարցը երկար պատասխան ունի։ Ակնհայտորեն՝ այո, դա սադրիչ դիտվեց Ադրբեջանում։ Կարելի է ասել, որ միշտ էլ մեկ շրջանակային լուծում է եղել՝ լիակատար ռազմական հաղթանակ, որին 1994 թվականին Հայաստանի Հանրապետությունը չհասավ, Ադրբեջանն էլ 2020 թվականին չհասավ։ Եթե դա չէ լուծումը, ապա Ադրբեջանը ստանում է այն, ինչ հայտնի է՝ յոթ շրջանները և հայերի համար ինչ-որ ինքնավարության կարգավիճակ։ Հիմա իրավիճակը հայերի համար ավելի վատ է»,- Future Studios-ի կազմակերպած՝ «Խոսենք ապագայից» խորագրով շարքի հերթական քննարկման ժամանակ, պատասխանելով «Առավոտի» հարցադրմանն այն մասին, թե «Ձեր գնահատմամբ՝ մինչև պատերազմը ՀՀ վարչապետ Նիկոլ Փաշինյանի կողմից հնչեցված՝ «Արցախը Հայաստան է և վերջ», «բանակցություններն սկսում եմ սեփական՝ զրոյական կետից» հայտարարություններն ինչպես ազդեցին Ադրբեջանի ռազմաքաղաքական քայլերի վրա»՝ ասաց Carniege Europe հիմնադրամի ավագ գիտաշխատող, Հարավային Կովկասի հարցերով փորձագետ Թոմաս դե Վաալը։ Նա նշեց․ «Ադրբեջանի տեսանկյունից, երբ նրանք լսեցին Նիկոլ Փաշինյանի այդ հայտարարությունները, որոնք չգիտեմ, թե ինչ պատճառով է նա արել, դրանք այսպես ասած՝ տեղ հասան։ Նա ասաց, որ փաստորեն չի բանակցում, խոսելու նյութ չկա, ուրեմն՝ միտք ծագեց վերադառնալու պատերազմի։ Ադրբեջանում բազեներին թև տվեցին և նրանք ասացին՝ իմաստ չունի բանակցելու։ Միաժամանակ, ես շատ եմ քննադատել Ադրբեջանին ճկունության պակասի համար, որովհետև չի առաջարկել խոսել Արցախի հայերի հետ»։


«Ժողովուրդ» օրաթերթը գրում է. «Դիլիջանի համայնքապետարանի ինտերնետային, պաշտոնական կայքում հրապարակվել է վարչապետ Ն. Փաշինյանի՝ 2021թ. փետրվարի 26-ի որոշմամբ Դիլիջան համայնքի ղեկավարի պաշտո­նակատար նշանակված Դավիթ Սարգսյանի կենսագրությունը: Այնտեղ նշված է, որ 1984թ. ծնված Դավիթ Սարգսյանը 2000թ. ավարտել է Հաղարծնի միջնա­կարգ դպրոցը, 2002-2004թթ. անցել է զինվորական ծառայություն ՀՀ զինված ուժերում, 2001-2006թթ. սովորել է Դիլիջանի պետական քոլեջում, ավարտելով այն՝ ստացել է տնտեսագետի եւ հաշվա­պահական հաշվառման մասնագետի որակավորում, հեռակա կարգով սովո­րում է ԵՊՀ-ի տնտեսագիտական ֆա­կուլտետում: Միջնակարգ կրթության հենքի վրա քոլեջում ուսումնառությունը մեկ տարի, 10 ամիս է, Դավիթ Սարգսյանը 2001-2006թթ. եղել է Դիլիջանի պետական քոլեջի ուսա­նող: 2001-2006թթ. 5 տարիներից 2-ը Դ. Սարգսյանը ծառայել է ՀՀ զինված ուժե­րում. ստացվում է, որ քոլեջն ավարտել է առնվազն 3 տարում: Դավիթ Սարգսյանի կենսագրության մեջ նշված է, որ նա 2016թ. ընտրվել է խոշոր Դիլիջան հա­մայնքի ավագանու անդամ: Նա անկու­սակցական է: Հայտնի է, որ նա Նիկոլ Փաշինյանի եղբորորդի, Տավուշի մարզից ԱԺ պատգամավոր Սիփան Փաշինյանի մտերիմ ընկերն է, Եւ հենց դրանով է պայ­մանավորված, որ միջնակարգ մասնագի­տական կրթությամբ Դ. Սարգսյանին Ն. Փաշինյանը նշանակել է Դիլիջան քաղա­քը եւ Հաղարծին, Թեղուտ, Գոշ, Հովք, Խաչարձան, Աղավնավանք գյուղերը միա­վորող Դիլիջան համայնքի ղեկավարի պաշտոնակատար: Դիլիջան համայնքը 2005-2021 թթ. ղեկավարած Արմեն Սանթրոսյանը 6 այլ նախկին համայնքապետերի հետ դիմել է ՀՀ սահմանադրական դա­տարան՝ համարելով, որ այլ անձանց հա­մայնքի ղեկավարի պաշտոնակատար նշանակելը սահմանադրական կարգի խախտում է, համայնքի ղեկավարի լիազո­րությունները դադարելուց հետո համայն­քի ղեկավարը պետք է շարունակի պաշտոնավարել, մինչեւ ՏԻՄ նոր ընտրու­թյուններ կանցկացվեն":


«Ժողովուրդ» օրաթերթը գրում է. «Հանրապետության չորս համայնք­ների գործող եւ նախկին համայնքապետեր դիմել են Սահմանադրական դատարան՝ վիճարկելով գործադիր իշխանության կողմից տեղական ինք­նակառավարմանը միջամտող օրենք­ների դրույթների սահմանադրականությունը:  Դիմումատուներից երեքը ներ­կայացնում են հանրապետության խոշորացված՝ Դիլիջան. Տաշիր եւ Թումանյան համայնքները, իսկ մեկը՝ Արթիկ համայնքը: Դիլիջանի նախկին համայնքապետ Արմեն Սանթրոսյանը, Թումանյանի նախկին համայնքապետ Լեւոն Զավարյանը, Տաշիր համայնքի գործող ղեկավար էդգար Արշակյանը եւ Արթիկ համայնքի ղեկավար Մխի­թար Վարագյանը Սահմանադրական դատարանում վիճարկում են «Տեղա­կան ինքնակառավարման մասին» ՀՀ օրենքի 27-րդ հոդվածի 2.1 կետի (հա­մայնքի ղեկավարի լիազորությունների ժամկետը լրանալու դեպքում վարչապետի կամ մարզպետի կողմից հա­մայնքի ղեկավարի պաշտոնակատա­րի նշանակումը) եւ 2020 թվականի հունիսի 18-ին ընդունված «ՀՀ ընտրա­կան օրենսգիրք Սահմանադրական օրենքում փոփոխություններ ու լրա­ցումներ կատարելու մասին» ՀՀ օրեն­քի անցումային եւ եզրափակիչ դրույթ­ների՝ 34-րդ հոդվածի 2-րդ մասի 2-րդ կետի (համայնքի ղեկավարի լիազո­րությունների ժամկետի լրանալու դեպքում համայնքի ղեկավարի ընտ­րություն չի նշանակվում, իսկ համայն­քի ղեկավարի լիազորությունները միևչեւ ավագանու լիազորությունների ժամկետը լրանալն իրականացնում է համայնքի ղեկավարի պաշտոնակա­տարը) սահմանադրականությունը":


«Ժամանակ» թերթը գրում է. «Իշխանությունները մոտ ապագայում կլուծեն Սյունիքի մարզի մի քանի, այսպես կոչված, խռովարար համայնքապետերի հարցերը, որոնք հանդես են գալիս իբրև թե ընդդիմադիրներ, սակայն նրանց իրական նպատակը հարուցված քրեական գործերից բխող պատասխանատվությունից խուսափելն է:  Մեր տեղեկություններով՝ այս շարքում առաջինը կլինի Գորիսի համայնքապետ Առուշ Առուշանյանը»:


«Իրավունք» օրաթերթը գրում է.«Պահեստազորի սպա, տնտեսագետ Արթուր Գրիգորյանի գնահատմամբ՝ 44-օրյա արցախյան պատերազմի ընթացքում գեթ մեկ տեղ չկար, որտեղ խնդիր չի եղել՝ թե՛ սպառազինության, թե՛ մարդկային ոեսուրսների ու համազգեստների մասով: Դրա համար ունենք այն հետեւանքը, որն ունենք, մինչդեռ ի վիճակի էինք այսպիսի հետեւանք չունենալու: "Խնդիրներն ի հայտ են եկել պատերազմի առաջին օրվանից: Ամենագլխավորներից՝ զրահաբաճկոնների եւ սաղավարտների հարցն է եղել, ինչպես նաեւ զինվորականների ճտքավոր կոշիկների: Վիրավորումների եւ մահվան դեպքերի մեծ մասն այն պատճառով էին, որ զրահաբաճկոնների կամ սաղավարտների պակաս կար, այսինքն՝ վիրավորումների եւ մահացությունների մեծ մասը բեկորային էր: Հարցն այն է, որ պետբյուջեի հատկացումների մասով եւ ընդհանրապես՝ ամեն մասով խնդիրներ էին ստեղծված: Օրինակ՝ մեկ զրահաբաճկոնի արժեքը Պաշտպանության նախարարության հաշվեկշռում 250 հազար դրամ է նշված, այնինչ ներկա պահին նույնիսկ տեղը կարող եմ ասել, որ կան բավականին էֆեկտիվ զրահաբաճկոններ, որոնց արժեքն է 130 հազար դրամ եւ մի քանի անգամ ավելի լավն է իր որակական հատկանիշներով: Այնինչ, պատերազմի օրերին ներկայիս իշխանության ներկայացուցիչները հրավիրում էին մեզ մարտի դաշտ՝ մեր իսկ զրահաբաճկոններով եւ մեր իսկ համազգեստով: Բայց ունենք 70 հազար ակտիվ զինվորականներ, 210 հազար՝ ռեզերվ, այսինքն՝ առնվազն 280 հազարի հաշվարկով պիտի մեր ՊՆ պահեստներում ունենայինք համապատասխան քանակի ե՛ւ զրահաբաճկոններ, ե՛ւ սաղավարտներ, ե՛ւ համազգեստներ՝ ամեն ինչ, ընդհուպ նաեւ բուշլատներ":


«Ժողովուրդ» օրաթերթը գրում է. «Օրաթերթին տեղեկություններ էին հասել, որ Ոստիկանության աշխատակիցները այս տարի կայացած հանրահավաքներին, ցույցերին ակտիվ մասնակցություն ունենալու համար երկու անգամ պարգեւավճար են ստացել: «ժողովուրդ» օրաթերթը գրավոր հար­ցում էր ուղարկել Ոստիկանության լրատվական ծառայություն եւ խնդրել տեղեկություն տրամադրել, թե վերջին ամիսների ընթացքում որքան պարգեւավճար են ստացել ոստիկանության աշխատակիցները, երբ եւ ինչ առիթով: Ոստիկանության լրատվական ծառայությունից, մեր հարցմանն ի պատասխան, հայտնել են, որ ՀՀ ոստիկանության ծառայողներին (աշխատողներին) 03.03.2021 թ.-ի դրությամբ հատկացվել է ամսական պարգեւատրում (ս/թ հունվար ամսվա համար)՝ 718.152.586 դրամ գումարի չափով, միանվագ դրամական պարգեւատրում («Պետական պաշտոններ եւ պե­տական ծառայության պաշտոններ զբաղեցնող անձանց վարձատրության մասին» օրենքի 22-րդ հոդվածի 9-րդ եւ 10-րդ մասերի հիման վրա)՝ 209.268.943 դրամի չափով: Ստացվում է՝ Ոստիկանության աշխատակիցները իսկապես պարգեւատրվել են երկու անգամ՝ մեկ անգամ՝հունվար ամս­վա համար, մեկ անգամ էլ՝ արդեն միանվագ»:


«Ժամանակ» թերթը գրում է. «Իշխանությունները ընդլայնում են կոռուպցիայի դեմ պայքարի գործիքակազմը: Շուտով Հայաստանի Կենտրոնական բանկում կբացվի բանկային հաշիվների կենտրոնացված ռեեստր, որին պարտադիր պետք է մասնակցեն Հայաստանի Հանրապետության տարածքում գործող բոլոր առևտրային բանկերը: Բանկերը այդ ռեեստրին պետք է տրամադրեն տվյալներ բացված և փակված բանկային հաշիվների մասին, այդ թվում՝ վերջին 5 տարիների ընթացքում փակվածների: Այս փոփոխությունը հնարավորություն կտա հետևելու նախորդ իշխանության տարբեր ներկայացուցիչների դրամական հոսքերին, և դրանից բխող հետևություններ անել»:


«Ժամանակ» թերթը գրում է. «Հայաստանի Քննչական կոմիտեն առաջարկում է փոփոխություն կատարել «ՀՀ քրեական օրենսգրքում», որը հնարավորություն կտա աշխարհազորայիններին և երկրապահ կամավորականի կարգավիճակ ունեցող անձանց համարել զինվորական կարգի դեմ ուղղված հանցագործությունների սուբյեկտ:  Չնայած աշխարհազորայինները ռազմական գործողություններին մասնակցում են կամավորության սկզբունքով, սակայն քանի որ նրանք մարտական գործողությունների ժամանակ իրականացնում են զինծառայողներին վերաբերելի գործառույթներ, հետևաբար մարտական գործողությունների ժամանակ կատարված հանցագործության համար կենթարկվեն նույնպիսի պատասխանատվության, ինչպես զինծառայողները»:


«Հայկական ժամանակ» թերթը գրում է. Մայր Աթոռի կողմից ներկրվող ապրանքների, մասնավորապես՝ մոմի հումքի մաքսազերծման հարցում խնդիրներ են առաջացել։ Այս մասին օրեր առաջ արձանագրել էր Մայր Աթոռ Սուրբ Էջմիածնի Գերագույն հոգեւոր խորհուրդը տեղի ունեցած ժողովի ժամանակ: Մոմի արտադրության համար անհրաժեշտ հումքը մեր երկիր ներկրվում էր Պարսկաստանից եւ Չինաստանից: «Հայկական ժամանակը» Տեր Վահրամ ավագ քահանա Մելիքյանից հետաքրքրվել է, թե մոմի հումքի մաքսազերծման հարցում մասնավորապես ի՞նչ խնդիրներ են առաջացել եւ ինչի՞ հետեւանքով: Ավագ քահանայի փոխանցմամբ՝ մոմը իբրեւ ծիսական պարագա ազատված է ավելացված արժեքի հարկից, սակայն, պարզվում է՝ նույն մոմի արտադրության համար անհրաժեշտ ներկրվող հումքը՝ պարաֆինը, պետք է մաքսազերծվի։ Նախկինում ՀՀ կառավարությանը կից գործող բարեգործական հանձնաժողովի կողմից եկեղեցու՝ այս նպատակով պարաֆինի ներմուծումը ճանաչվում էր բարեգործական, եւ ըստ այդմ էին կազմակերպվում մաքսային ընթացակարգերը։ Սակայն 2018 թվականից առ այսօր ՀՀ կառավարության Բարեգործական խորհրդակցական հանձնաժողովի կողմից ներկրված պարաֆինը բարեգործական չի ճանաչվում, ինչն էլ խնդիրներ է ստեղծում։ «Եթե սկզբնապես՝ մինչեւ խնդրի լուծումը, թույլ էր տրվում ապրանքը տեղափոխել Մայր Աթոռ, ապա վերջերս նաեւ դա արգելվեց»,- նկատում է Տեր Վահրամը՝ հավելելով՝ փոփոխությունը հանգեցրել է պարաֆինի պաշարների սպառման։ Նրա փոխանցմամբ՝ այժմ մոմի արտադրությունը կանգնեցված է: Հասկանալի է, որ արտադրված մոմի պաշարն էլ անվերջ չէ, եւ առաջիկայում եկեղեցիներում մոմավառության արդյունավետ կազմակերպումը լուրջ դժվարություններ կառաջացնի:


«Ժողովուրդ» թերթը գրում է. «Հայաստանում ջերմոցատերերը դժգոհում են. դոլարի փոխարժեքի բարձրացման հետեւանքով թանկացել են թունաքիմիկատները, պարարտանյութը: Մյուս կողմից՝ նախորդ տարվա հուլիսի 19-ից ջերմոցատերերի համար բարձրացել է գազի գինը, օրինակ՝ ջերմոցային տնտեսու­թյունները ջեռուցման սեզոնին՝ նոյեմբերի 1-ից մարտի 1-ն ընկած ժամանակահատվածում, 1000 խմ-ի դիմաց վճարում են 224 դոլար՝ նախկին 212- ի փոխարեն: Ջերմոցային տնտեսությամբ զբաղվող տնտեսվարողներից մեկը՝ Հրաչիկ Բաբախանյանը, «Ժողովուրդ» օրաթերթի հետ զրույցում նկատեց, որ գազի գինը բավականին բարձր է, այն ապրանքի ինքնարժեքի գերակշռող մասն է կազմում. «Այս պահին տեղական շուկայում թուր­քական ծագման լոլիկ կա, դուք ինքներդ կարող եք մոնիտորինգ անել մեծածախ շուկաներում, փաստացի կտեսնեք, եւ բավականին էժան է տե­ղական արտադրանքից»: Տեղեկացնենք, որ Հայաստանում թուրքական ապրանքների 6-ամսյա արգելքն ուժի մեջ է մտել հունվարի 1-ից: Օրեր առաջ ՀՀ էկոնոմիկայի նախարար Վահան Քերոբյանը խորհրդարանում հայտարարեց, որ մտադիր է հանդես գալ այն երկարացնելու առաջարկով: Թվում է, թե այս ամենի արդյունքում կարող են շահել տեղական ջերմոցատերերը, բայց, մասնագետների խոսքերով, էժան է նաեւ իրանական ծագ­ման բանջարեղենը, լոլիկն այնտեղ մայիսին հասնում է: Այսինքն՝ Թուրքիայից լոլիկ ներկրողը կարող է այն ներմուծել Իրանից: Ստացվում է, որ դարձյալ տուժելու են հայրենի գյուղատնտեսները»:


 


 


 


 

Մամուլ. Փաշինյանը խոստացել է հրաժարական տալ մարտի 9-ին կամ 10-ին, բայց նրան չեն հավատում
Հաջորդ նորություն next