Պահածոների և հյութերի արտահանումն աճել է, գինու ու կոնյակի արտահանումը՝ շեշտակի նվազել

Կառավարության փետրվարի 11-ի նիստի ժամանակ վարչապետ Նիկոլ Փաշինյանը հայտարարեց, որ 2020 թվականին Հայաստանից պահածոների և հյութերի արտահանումն աճել է 30 և 38 տոկոսով, սակայն խաղողի գինիների և կոնյակի սպիրտի արտահանումը նվազել է 18 և 23 տոկոսներով:

Պահածոների և հյութերի արտահանման աճը, վարչապետի խոսքով, վկայում է վերամշակող արդյունաբերության արդյունավետ աշխատանքի մասին։ «Եվ սա շատ կարևոր ցուցանիշ է», - ասաց Փաշինյանն ու խոսեց «վատ ցուցանիշների մասին»։

«Ունենք մի վատ ցուցանիշ, երբ խաղողի գինիների և կոնյակի սպիրտի արտահանումը նվազել է 18 և 23 տոկոսներով։ Եվ երեկ էկոնոմիկայի նախարարի տեղակալը շատ հետաքրքիր տվյալներ ներկայացրեց, որից իմացանք, որ մեր ավանդական շուկաներում իրականում այս ապրանքատեսակների վաճառքներն ավելացել են։ Բայց մեր արտահանումը նվազել է», - նկատեց նա։

Վերլուծությունը, ըստ վարչապետի խոսքի, ցույց է տվել հետաքրքիր բան, որ կորոնավիրուսով պայմանավորված այդ շուկաներում աճը տեղի է ունեցել օնլայն վաճառքների հաշվին։

«Մենք կանգնել ենք մի իրողության առաջ, որ մեր ընկերությունները, ցավոք սրտի, այդ օնլայն վաճառքի հարթակներում պատշաճ ներկայացված չեն։ Սա վկայում է այն մասին, որ մենք ընդհանրապես առաջակցության ծրագիր վերնագիրն ընդհանրապես պետք է փոխենք, պետք է ունենանք զարգազման ծրագրեր։ Աջակցելու պրոցեսը որպես կանոն պահպանողական է»,- նկատեց Փաշինյանը։