Փաշինյանը հրաշքի համար շնորհակալություն հատնեց Վլադիմիր Պուտինին

Վարչապետ Նիկոլ Փաշինյանը շնորհակալություն հատնեց ՌԴ նախագահ Վլադիմիր Պուտինին, որ ջանք գործադրեց ու հրաշք տեղի ունեցավ՝ 70 օր անհետ կորած 6 հայ զինվորները վերադարձան հայրենիք: Այս մասին նա հայտարարեց Սիսիանում:

Փաշինյանի խոսքով, տարածքները շատ մեծ են և պարզ չէ, թե որտեղ են մեր տղաները, որպեսզի հենց այդ տարածքներ մտնեն ու դուրս բերեն նրանց: Նա նշեց, որ եղել է, որ բարձրախոսով և՛ ռուսերեն, և՛ հայերեն են հայտարարել, որ արդեն հրադադար է, որպեսզի նրանք դուրս գան, բայց արձագանք չի եղել:

"Թերևս չեն վստահել, որովհետև ադրբեջանցիները ևս կարող են հայերեն խոսել", - ասաց Նիկոլ Փաշինյանը։

Փաշինյանը տեղեկացրեց, որ զինծառայողները հյուծված են, սակայն նրանցից ոչ մեկի կյանքին վտանգ չի սպառնում։ Նաև հաշմանդամություն չի սպառնում.

"Տղաները կվերադառնան լիարժեք կյանքի", - հավելել է նա։

VERELQ-ը հիշեցնում է, որ  թշնամու վերահսկողության տակ անցած տարածքներում իրականացվող որոնողական աշխատանքների արդյունքում՝ ԱՀ արտակարգ իրավիճակների պետական ծառայության, Արցախում խաղաղապահ առաքելություն իրականացնող ռուսական զորակազմի և Կարմիր խաչի միջազգային կոմիտեի ջանքերով նախօրեին ավելի քան 70 օր անհայտության մեջ գտնվող ժամկետային 6 զինծառայողներ վերադարձան հայրենիք: Նրանք են՝

Արսեն Կարենի Այվազյանը,

Դավիթ Գեղամի Սահակյանը,

Նիկոլայ Սեյրանի Ստեփանյանը,

Արթուր Գարիկի Հարությունյանը,

Արման Արշակի Արմաղանյանը և

Ռուսլան Սարգիսի Թումանյանը: