Ռուսաստանում սկսել է գործել Ադրբեջանից լոլիկի եւ խնձորի ներկրման արգելքը

Ռուսաստանում դեկտեմբերի 10-ից սկսել է գործել «Ռոսսելխոզնադզորի» արգելքը Ադրբեջանից լոլիկի եւ խնձորի ներկրման համար, հաղորդում է «Ինտերֆաքսը»:

Ինչպես հայտնել է «Ռոսսելխոզնադզորը», այդ որոշումն ուղղված է բուսասանիտարական բարեկեցության ապահովմանը, Ռուսաստանի տարածքում վնասատուների ներմուծման եւ տարածման կանխարգելմանը:

Ավելի վաղ «Ռոսսելխոզնադզորը» քանիցս հայտնել է Ադրբեջանի պարենային անվտանգության գործակալությանը՝ ԵԱՏՄ անդամ երկրների համար կարանտինային օբյեկտների համակարգված հայտնաբերման մասին, որոնք մատակարարվում են Ռուսաստան: Այսպես, միայն հոկտեմբերի 22-ից լոլիկի եւ խնձորի մեջ Ադրբեջանից 17 անգամ հայտնաբերել են հարավամերիկյան լոլիկի ցեց:

Ադրբեջանը Ռուսաստան լոլիկի մատակարարներից առաջատարն է։ Պտուղ-բանջարեղենային միության տվյալներով՝ 10 ամսվա ընթացքում դրանց ներմուծումը հասել է 190 մլն դոլարի՝ կազմելով 171 հազար տոննա: Այս տարի ՌԴ-ում լոլիկի ներմուծման ընդհանուր ծավալում դրա մասնաբաժինը հասել է 38 տոկոսի:

Գյուղնախարարությանն առընթեր ագրոանալիտիկայի կենտրոնի տվյալներով ՝ 2019 թվականին Ադրբեջանը ՌԴ է արտահանել 172,3 հազար տոննա լոլիկ՝ 558,5 հազար տոննա ընդհանուր մատակարարումներից:

Միևնույն ժամանակ, ՌԴ-ին խնձոր մատակարարելու հարցում Ադրբեջանի մասնաբաժինը գնահատվում է 4-5 տոկոս։

Դեկտեմբերի 9-ին «Ռոսսելխոզնադզորի» ղեկավար Սերգեյ Դանկվերտը բանակցություններ է վարել Ադրբեջանի պարենային անվտանգության գործակալության ղեկավար Գոշգար Իլահի օղլի Թահմազլիի հետ:

Ենթադրվում է, որ դեկտեմբերի 11-ին երկու երկրների մասնագետները լրացուցիչ կքննարկեն ստեղծված իրավիճակը եւ կաշխատեն Ադրբեջանից Ռուսաստան պտուղ-բանջարեղենի արտահանման ժամանակ ռեգիոնալիզացիայի սկզբունքի կիրառման հնարավորությունը:

Այդ սկզբունքը նախատեսում է արտադրանքի մատակարարում միայն այն տարածաշրջաններից, որտեղ կարանտինային օբյեկտներ չեն հայտնաբերվել։