Ալի Հասանով. Պուտինի նախաձեռնությամբ ինտենսիվ բանակցություններ կսկսվեն Ղարաբաղի հարցով

ՌԴ նախագահ Վլադիմիր Պուտինի նախաձեռնությամբ մոտակա ժամանակներս կարող են ինտենսիվ բանակցություններ սկսվել ղարաբաղյան հակամարտության կարգավորման համար: Այդ մասին հայտարարել է Ադրբեջանի նախագահի հասարակական-քաղաքական հարցերով օգնական Ալի Հասանովը:

«Նախաձեռնությունը ստացվել է ՌԴ նախագահ Վլադիմիր Պուտինի կողմից: Նա դիմել է երկու երկրների նախագահներին և համապատասխանաբար այժմ պատրաստվում է բանակցային գործընթաց:Հավանաբար մոտակա օրերս կսկսվի բանակցությունների ինտենսիվ փուլը», -նշել է Հասանովը Հազար հեռուստաընկերության եթերում:

Պաշտոնական Երևանը ևս հաստատեց բանակցությունների ակտիվացման վերաբերյալ ՌԴ իշխանությունների դիմումի մասին տեղեկատվությունը: VERELQ-ի հետ զրույցում, ՀՀ նախագահի մամլո խոսնակ Վլադիմիր Հակոբյանը նշեց, որ առաջիկա ժամերին հայկական կողմը կհայտնի իր դիրքորոշման մասին:

ՌԴ նախագահ Վլադիմիր Պուտինը ապրիլի 14-ին ժողովրդի հետ ուղիղ կապի ժամանակ անդրադարձել էր ապրիլի սկզբին Ղարաբաղում իրավիճակի կտրուկ սրմանը՝ նշելով, որ ղարաբաղյան հակամարտությանը պետք է «շատ զգուշորեն մոտենալ»: Նա նաեւ հավաստաիացրել էր, որ առաջիկայում ՌԴ-ն մեծ ներդրում կունենա խնդրի կարգավորման հարցում:

Լեռնային Ղարաբաղում զորքերի շփման գծում ապրիլի 2-ին իրավիճակը կտրուկ լարվել է՝սկսվել են ռազմական թեժ բախումները, ինչից հետո հակամարտության կողմերը միմյանց են մեղադրել հրադադարի խախտման համար:Ապրիլի 5-ին ժամը 12.00-ին կրակի դադարեցման պայմանավորվածություն է ձեռք բերվել: Այն ձեռք է բերվել Մոսկվայում ՀՀ և Ադրբեջանի ԳՇ պետերի հանդիպման ընթացքում: Սակայն դրանից հետո Ադրբեջանը հրադադարի խախտման և դիվերսիոն փորձեր է իրականացրել: