Բախումներ Ղարաբաղում. "Ադբեջանը կորցրել է 14 տանկ և 5-ից ավելի այլ զրահատեխնիկա"
Ղարաբաղա-ադրբեջանական հակամարտ զորքերի շփման գծի ողջ երկայնքով իրավիճակը տակավին մնում է լարված: Առավել ուժգին բախումներ են տեղի ունենում մարտագծի հյուսիսարևելյան և հարավարևելյան ուղղություններում: Այս մասին հայտնում է ՀՀ պաշտպանության նախարարի մամլո խոսնակ Արծրուն Հովհաննիսյանը՝ գրառում կատարելով իր ֆեյսբուքի էջում:
Հիշեցնենք, որ ժամեր առաջ Ադրբեջանի պաշտպանության նախարարությունը հաղորդել էր, որ Բաքուն միակողմանիորեն դադարեցնում է ռազմական գործողությունները շփման գծի ողջ երկայնքով: Տեղեկատվությունը հերքեցին Հայաստանի և Ղարաբաղի պաշտպանության նախարարությունները՝ որակելով այն որպես "տեղեկատվական ծուղակ":
Այս պահին առաջնագիծ են շարժվում մեծ թվով "Երկրապահ" կամավորներ: Ավելի վաղ հայտնել էինք, որ Երկրապահում համար առաջին մարտական պատրաստություն է հայտարարված: ԵԿՄ վարչության նախագահ, գեներալ Մանվել Գրիգորյանի հանձնարարությամբ երկրապահ ազատամարտիկները շարունակաբար լինում են սահմանային զորամասերում, մարտական հենակետերում:
Ըստ տարբեր աղբյուրներից ստացվող տեղեկատվության, Հայաստանը Ղարաբաղ է տեղափոխել "Սմերչ" և "Տոչկա Ու" հրթիռային համակարգեր: ՀՀ նախագահ Սերժ Սարգսյանն Ապրիլի 2-ի Անվատանգության խորհրդի նիստին հայտարարեց, որ Հայաստանը պետք է կատարի Արցախի անվտանգության երաշխավոի պարտավորությունները:
Այժմ ՊԲ ստորաբաժանումները Թալիշի ուղղությամբ, Հայտնում է Հովհաննիսյանը, ադրբեջանական կողմին հասցնում են կենդանի ուժի և զինտեխնիկայի մեծ կորուստներ: "Հաստատված տվյալներով այս հատվածում ադրբեջանական զինուժը կորցրել է 3 տանկ: Եվս 2 տանկ և 1 ՀՄՄ հակառակորդն այսօր կորցրել է հարավարևելյան ուղղությամբ: Ընդհանուր առմամբ երեկ և այսօր՝ ադրբեջանական բանակը կորցրել է 14 տանկ և 5-ից ավելի այլ զրահատեխնիկա, այդ թվում՝ հետևակի մարտական մեքենա (ՀՄՄ): Ղարաբաղյան բանակը տվել է 1 տանկի կորուստ", - հայտնում է նա:
Մարտագծի հարավարևելյան ուղղությամբ ևս ընթանում են դիրքային թեժ մարտեր: "Հակամարտ զորքերի շփման գծում հակառակորդն իր անզորությունը փորձում է պարտակել խաղաղ բնակիչների, մասնավորապես Մարտակերտ քաղաքի վրա ՄՄ-21 ("Գրադ") հրթիռահրետանային կայանքից և 152 միլիմետրանոց հրետանային միջոցներից իրականացվող արկակոծումներով", - նշում է Հովհաննիսյանը:
Ապրիլի 1-ի լույս 2-ի գիշերը շփման գծի հարավային, հարավարեւելյան եւ հյուսիսարեւելյան ուղղություններով ադրբեջանական կողմը ձեռնարկել է բացահայտ հարձակողական գործողություններ` այլ զինատեսակների հետ միասին օգտագործելով հրետանի, զրահատեխնիկա եւ օդուժ: Ադրբեջանական կողմին հաջողվել էր գրավել հայկական մի քանի մարտական դիրքեր, որոնք հետագայում ղարաբաղյան ուժերը կրկին վերցրել էին վերահսողության տակ:
ՀՀ պաշտպանության նախարարի մամլո խոսնակ Արծրուն Հովհաննիսյանի հաղորդմամբ, մարտերի ժամանակ ադրբեջանական բանակը ուղղաթիռներից բացի կորցրել է նաև ԱԹՍ և տանկեր: Ղարաբաղա-ադրբեջանական հակամարտ զորքերի շփման գծի ողջ երկայնքով իրադրությունը մնում է ծայրաստիճան լարված: Հայկական կողմի կորուստները՝ 18 զոհ և 35-ին մոտ վիրավոր:
Ադրբեջանական կողմը հայտնում է 12 զոհերի մասին, սակայն, ըստ հայկական կողմի տեղեկատվության, նրանց թիվն անցնում է 200-ից:
