«Էրեբունի Պլազա»-ում կրակոցներ արձակած երիտասարդը տեղափոխվել է հոգեբուժարան

«Էրեբունի Պլազա»-ում կրակոցներ արձակած երիտասարդը դատարանի որոշմամբ տեղափոխվել է հոգեբուժարան՝ ստացիոնար դատահոգեբանական փորձաքննություն անցնելու նպատակով: Այս մասին հայտնել է Քննչական կոմիտեի մամուլի խոսնակ Արամ Ավետիսյանը։

Արթուր Թորոսյանին մեղադրանք է առաջադրվել Քրեական օրենսգրքի երկու հոդվածով՝ կյանքի կամ առողջության համար վտանգավոր բռնություն գործադրելով պատանդ վերցնելու և գույքը դիտավորությամբ ոչնչացնելու կամ վնասելու հատկանիշներով։

Հիշեցնենք, հունվարի 23-ին ժամը 14:40-ի սահմաններում ոստիկանությունը կրակոցների վերաբերյալ ահազանգ էր ստացել, անմիջապես օպերատիվ խմբեր էին մեկնել հյուրանոց: Զինված տղամարդու հետ բանակցություններ էին տարվել, ինչից հետո Թորոսյանին տեղափոխել էին ոստիկանություն, ձերբակալել, ապա օրեր անց կալանավորել։