Փաշինյան. 2020թ. պետական բյուջեի նախագիծը հեղափոխական է

2020թ. պետական բյուջեի նախագիծը հեղափոխական է: Այս մասին Ազգային ժողովում Հայաստանի Հանրապետության 2020 թ. պետական բյուջեի մասին օրենքի նախագծի քննարկման ժամանակ այսօր հայտարարեց ՀՀ վարչապետ Նիկոլ Փաշինյանը:

Նա հիշեցրեց, որ 2018թ. հեղափոխության շրջանում, երբ դեռ վարչապետ չէր, նա հայտարարել էր, որ մեկ-երկու տարվա ընթացքում ՀՀ բյուջեն պետք է ավելանա 30-35%-ով և դա իր հեղափոխության խոստումներից մեկն էր.

«Հիմա, 2020թ. պետական բյուջեի նախագծում եկամտային մասը 2018թ. եկամտային մասը գերազանցում է 27.4%-ով, եթե սրան գումարում ենք նաև 2018թ. ընթացքում բյուջեի գերակատարման ցուցանիշները, որոնք արդեն 62 միլիարդով գերակատարված են, ուրեմն բյուջեի աճը կազմում է 33%, իսկ, եթե սրան ավելացնում ենք այն բյուջետային կորուստները, որ մենք մեր որոշումների արդյունքում ունեցել ենք, մեր աճն արդեն իսկ կազմում է 35%: Սա ուղիղ պատասխան է այն հարցին, թե արդյոք այս բյուջեն հեղափոխական է»,- ասաց Փաշինյանը՝ նշելով, որ սա ճշգրիտ իրագործումն է այն խոստման, որը ինքն անձամբ է հնչեցրել:

Ըստ վարչապետի, 2020թ. նախատեսված կապիտալ ծախսերը 2018թ. փաստացի ցուցանիշի նկատմամբ ավել են ուղիղ 135.1%-ով և այլ կերպ, քան հեղափոխական, սա չի կարելի անվանել:

Փաշինյանը նաև հավելեց, որ Հայաստանում տնտեսական հեղափոխությունը ոչ միայն ընթացքի մեջ է, այլև ամեն օրվա հետ թափ է հավաքում.

«Հեղափոխությունը 2020թ. հունվարի 1-ից նոր թափ է հավաքելու»,- հավելեց նա: