«Պոբեդա»-ի թնջուկը. ՀՀ-ում խնդիրը լուծված են համարում, ՌԴ-ից հստակ պատասխան չկա

«Պոբեդա» ավիաընկերության դեպի Հայաստան իրականացվող չվերթների դադարեցմանը հանգեցրած խնդիրը լուծված է: Այս մասին հայտնում են ՀՀ քաղաքացիական ավիացիայի կոմիտեից:

Նշվում է, որ հայկական կողմը զրուցել է ռուսական «Պոբեդա» ավիաընկերության հայաստանյան ներկայացուցչի հետ և խնդիրը լուծված է: Այսօր հանդիպում է կազմակերպվել «Պոբեդա»-ի և «Շիրակ» օդանավակայանի ներկայացուցիչների հետ:

Ուշագրավն այն է, որ այս թեմայի շուրջ իրարամերժ տեղեկատվություն է ստացվում: Մինչ հայաստանյան լրատվամիջոցները, հղում անելով ավիաընկերության հայաստանյան ներկայացուցչին ու նաև ՀՀ քաղաքացիական ավիացիայի կոմիտեին գրում են, թե խնդիրը հարթված է, «Պոբեդա»-ի խոսնակը հայտարարել է, որ ավիաընկերությունը Հայաստանում ներկայացուցիչ չունի և որ խնդիրը լուծված չէ:

VERELQ-ը հաջորդիվ կներկայացնի ավիաընկերության պատասխանը ստեղծված իրավիճակի շուրջ հարցմանը:

Ավելի վաղ տեղեկացրել էինք, որ ըստ ռուսական լրատվամիջոցների՝ Լոուքոսթեր «Պոբեդան» դադարեցրել է Մոսկվայից Գյումրի ավիատոմսերի վաճառքը ձմռան սեզոնի համար: Թռիչքները ժամանակավորապես դադարեցվել են Գյումրիի օդանավակայանում վառելիքի թերլիցքավորման խնդիրների պատճառով: