«Կոնսենսուս մինուս մեկ». արտախորհրդարանական ուժերը համախմբվելու են Փաշինյանի դեմ

271

«Կարծում եմ` «կոնսենսուս մինուս մեկ»-ը, որպես գաղափար, արդեն ձևավորվել է քաղաքական դաշտում: Բոլորը տեսնում են, որ պետական ապարատը ծառայում է ոչ թե երկրի զարգացման ծրագրերին, այլ մեկ մարդու բնազդներին ու քմահաճույքներին, որ բխում են նրա` ծայրահեղ պարզունակ աշխարհայացքից: Աշնանն ընդդիմության դաշտում համախմբման և գործընկերության ձևավորման գործընթացը կավարտվի, և քաղաքական պայքարը կստանա համակարգված ու մասշտաբային բնույթ»: Այս մասին անդրադառնալով ՀՀ ներքաղաքական զարգացումներին հայտարարել է ՀՀ երկրորդ նախագահ Ռոբերտ Քոչարյանը:


Քոչարյանը ներքաղաքական դիսկուրս է բերում «կոնսենսուս մինուս մեկ» թեզիսը, այսինքն արտախորհրդարանական և հնարավոր է նաև որոշ խորհրդարանական ուժերի՝ օրինակ ԲՀԿ, համախմբում վարչապետ Նիկոլ Փաշինյանի և նրա քաղաքական թիմի դեմ: Այդ թեզիսը ենթադրում է նոր ընդդիմադիր բևեռի ձևավորում, որտեղ կհամախմբվեն այն ուժերը, որոնք կունենան ազգային-պետական մտածողություն, պահպանողական գաղափարախոսություն՝ ի հակադրություն այսօրվա գործող իշխանությունների ուլտրալիբերալ թեզիսների:


Նոր բևեռի ձևավորումը տեղի է ունենալու Փաշինյանի ռեյտինգի անկման պարագայում: Արտախորհրդարանական ուժերից ՀՀԿ-ն, ՀՅԴ-ն, Քոչարյանի աջակիցները, որոնք դեռևս մեկ միասնական թիմով  հանդես չեն գալիս, ինչպես նաև Փաշինյանին քննդատող տարբեր խմբեր՝ ՎԵՏՕ, Ադեկվատներ և այլն, փորձելու են մաշեցնելով Փաշինյանի ռեյտինգը ձևավորել արտախորհրդարանական ուժեղ թիմ՝ վարչապետի հրաժարականի և արտահերթ ընտրությունների պահանջով:


ՀՀ-ում ներքաղաքական զարգացումները ֆորս-մաժորային սցենար կարող են ստանալ մի քանի պատճառներով, որոնցից ամենակարևորը ղարաբաղյան հարցն է և Ադրբեջանի հնարավոր ռազմական ագրեսիան: Այս պայմաններում հասարակությունը կպահանջի ուժեղ ձեռք ու համազգային համախմբում ու այս ֆոնին արտախորհրդարանական ուժերը կստանան շանս վերցնել իշխանությունն ու պատերազմում հաղթելու պարագայում ունենալ աննախադեպ բարձր ռեյտինգ ու որպես պատերազմը հաղթած թիմ մնալ իշխանության բավականին երկար ժամանակահատվածով:


Երկրորդ սցենարը՝ ներքաղաքական լարվածության աճ սոցիալ-տնտեսական բազմաթիվ չլուծվող խնդիրների պատճառով, որոնց կարող է գումարվել նաև տարբեր սեռական փոքրամասնությունների իրավունքների ամրապնդման մասին կոնվենցիաների՝ Ստամբուլյան կոնվենցիա և այլն, վավերացումը այսօրվա ԱԺ-ի կողմից, որտեղ մեծամասնությունն է Նիկոլ Փաշինյանի թիմը:


Ազգային արժեքներին ու մենթալիտետին հարվածող ուլտրալիբերալ և Արևմուտքի կողմից պարտադրվող այդ թեզիսները կարող են առաջացնել համազգային պայթյուն ու արտախորհրդարանական ուժերն հանրային այդ դժգոհությունն ուղղելու են Փաշինյանի կառավարության և նրա թիմի դեմ՝ երկիրը տանելով դեպի արտահերթ ԱԺ ընտրություններ, որտեղ արդեն Փաշինյանի և նրա թիմի շանսերը մինիմալ են լինելու:

Տպել

Թեմայի այլ նորություններ
Загрузка...