Եթե մենք դասեր չքաղենք, թավշյա հեղափոխությունը կդառնա թավշյա հեռացում. Սասուն Միքայելյան

Կոտայքի մարզպետ Ռոմանոս Պետրոսյանը ցանկանում է մարզում «դեմք դառնալ»՝ փորձելով իր թեկնածուին քաղաքապետ դարձնել, ինչը, սակայն, նրան այդպես էլ չի հաջողվել: Այս մասին հայտարարել է իշխող «Քաղաքացիական պայմանագիր» կուսակցության հիմնադիր անդամ, «Իմ քայլը» խմբակցության պատգամավոր Սասուն Միքայելյանը:

Նա այսօր սուր քննադատության ենթարկեց կուսակից գործընկերոջը՝ Կոտայքի մարզպետ Ռոմանոս Պետրոսյանին: Միքայելյանը հենց նրան մեղադրեց Աբովյանի քաղաքապետի ընտրություններում իշխանության թեկնածուի պարտության համար՝ ընդգծելով՝ Ռոմանոսը ցանկանում է մարզում «դեմք դառնալ»՝ փորձելով իր թեկնածուին քաղաքապետ դարձնել, ինչը, սակայն, նրան այդպես էլ չի հաջողվել:

Սասուն Միքայելյանը չթաքցրեց՝ կուսակցությունում դեմ է քվեարկել իշխող ուժի կողմից առաջադրված Գրիգոր Գուլյանի թեկնածությանն՝ ասելով, որ գործող քաղաքապետը՝ Վահագն Գևորգյանն, որը հաղթեց Աբովյանի ընտրություններում, շատ լավ աշխատում է քաղաքապետի պաշտոնում՝ նրան հաջողվել է գերակատարել քաղաքի բյուջեն:

«Բարգավաճ Հայաստան» կուսակցության աջակցությունը ստացած Գևորգայնին Միքայելյանը վաղուց է ճանաչում, գործող քաղաքապետը երկար տարիներ աշխատել է խորհրդարանի պաշտպանության հանձնաժողովում՝ իբրև փորձագետ և նա պետք է շարունակեր աշխատել:

Չնայած իր տեսակետը չի ընդունվել, բայց Սասուն Միքայելյանը վստահեցնում է՝ իշխանության թեկնածուի դեմ չի աշխատել։

«Ես ՔՊ-ի թեկունքից չեմ խփել, որևէ մեկի չեմ ասել, որ պիտի գնաք, ընտրեք գործող քաղաքապետին։ Նման բան չի եղել։ Իսկ Աբովյանի ընտրությունները «Քաղաքացիական պայմանագիր»-ը պարտվեց հենց Ռոմանոսի միջոցով, որովհետև ինքն անձնավորեց իրա դերակատարությունն Աբովյանի քաղաքապետի ընտրությունում, դրան գումարած պատկերացրեք, որ եթե վարչապետը չգնար Աբովյան, ինչ էր կատարվելու։

Էսօր մարդիկ կան, որ էս շարժման մեջ՝ իներցիայի տակ, ժողովուրդը ինչ-որ հարցի շուրջ ձայն է տալիս, իրենք գիտեն, թե դեմք են դառել, կամ մեծ դերակատարություն են ունեցել հայոց պատմության, կամ այսօրվա իրողության կամ ընդհանրապես էս վերջին թավշյա հեղափոխության հետ կապված։ Դրան գումարած էդպես մի ակտիվ չէր Ռոմանոսը թավշյա հեղափոխության ժամանակ, և եթե մենք դասեր չքաղենք, էս թավշյա հեղափոխությունը մեր կողմից կդառնա թավշյա հեռացում», - ասաց Միքայելյանը։