Վաչե Գաբրիելյան. հոսանքի թանկացման ուսումնասիրությունների արդյունքները հայտնի կդառնան սեպտեմբերի վերջին

Էլեկտրաէներգիայի սակագների բարձրացման հիմնավորված լինելու խորհրդակցությունների արդյունքները հայտնի կդառնան սեպտեմբերի վերջին: Այդ մասին կառավարության նիստում հայտարարել է փոխվարչապետ Վաչե Գաբրիելյանը:

Նա նշել է, որ Deloitte & Touche քոնսալթինգային ընկերությունն արդեն սկսել է Հայաստանի էլցանցերում աուդիտ իրականացնել: Ամբողջությամբ աուդիտը կավարտվի այս տարվա նոյեմբերին: Նրա խոսքով, առաջին փուլում պատրաստվելու է ամբողջ արտադրական շղթայի վերլուծությունը՝ 2010-2015թթ.-ի համար: Դա ենթադրում է Հանրային ծառայությունները կարգավորող հանձնաժողովի կողմից էլեկտրաէներգիայի սակագների ձևավորման վերլուծություն:

Հիշեցնենք, որ Հայաստանի էլցանցերում աուդիտի իրականացման մասին հայտարարել է ՀՀ նախագահ Սերժ Սարգսյանը հունիսի վերջին՝ Երևանում էլեկտրաէներգիայի թանկացման դեմ ուղղված օրեր տևած բողոքի ակցիաներից հետո: Էլցանցերը 250 միլիոն դոլարի պարտքեր է կուտակել: Հունիսի 17-ի նիստում հանձնաժողովը որոշում է կայացրել բարձրացնել սակագինը յոթ դրամով: Որոշումը զանգվածային բողոքի ակցիաներ է առաջացրել Երևանում, որոնք շարունակվել են ավելի քան երկու շաբաթ:

Այն ժամանակ նախագահը նաև հայտարարել է, որ մինչև աուդիտի ավարտը կառավարությունը իր վրա կվերցնի էլեկտրաէներգիայի սակագների բարձրացման ծանրությունը: Կառավարությունը նաև որոշել է փոխհատուցել սակագների թանկացումը փոքր և միջին բիզնեսի համար: Ինչպես այսօր հայտարարել է ՀՀ էներգետիկայի և բնական պաշարների նախարար Երվան Զախարյանը, ՓՄՁ-ների փոխհատուցումները կսկսվեն սեպտեմբերի 14-ից:

Նա հիշեցրել է, որ փոխհատուցումները տարածվելուն են այն բիզնեսների վրա, որոնք ամսեկան սպառում են մինչև 500 կվժ՝ 250 կվժ-ի չափով: