ՀԱՊԿ գլխավոր քարտուղարը հերքում է "մարտի 1-ի գործով" իր դեմ ներկայացրած մեղադրանքը

ՀԱՊԿ գլխավոր քարտուղար Յուրի Խաչատուրովը հերքում է "մարտի 1-ի գործով" իր դեմ ներկայացրած մեղադրանքը: Երևան քաղաքի ընդհանուր իրավասության դատարանը այժմ նիստ է անցկացնում ՀՔԾ-ի կողմից ներկայացված միջնորդության հարցով` Խաչատուրովի նկատմամբ կալանավորումը որպես խափանման միջոց ընտրելու համար:

Խաչատուրովը, ով 2008 թվականին զբաղեցնում էր Երևանի կայազորի պետի պաշտոնը, հրաժարվեց պատասխանել լրագրողների հարցերին: Այն հարցին, թե արդյոք ընդունում է իր դեմ ներկայացված մեղադրանքը, Խաչատուրովը պատասխանեց՝ ոչ:

Այժմ դատական նիստն ընդմիջվել է պաշտպանությանը առաջադրված մեղադրանքներին ծանոթանալուն բավարար ժամանակ տրամադրելու նպատակով

Այս պահին Երևան քաղաքի ընդհանուր իրավասության դատարանի Շենգավիթի նստավայրում քննվում է նաև ՀՀ երկրորդ նախագահ Ռոբերտ Քոչարյանին կալանավորելու նախաքննական մարմնի միջնորդությունը:

Քոչարյանին ու Խաչատուրովին մեղադրանք է ներկայացվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նրանք այլ անձանց հետ նախնական համաձայնությամբ տապալել են Հայաստանի Հանրապետության սահմանադրական կարգը: