Սպասվում է ԳՄ նիստ Սերժ Սարգսյանի մասնակցությամբ. ՀՀԿ-ն որոշելու է Փաշինյանին աջակցողներին

Սերժ Սարգսյանն այսօր երեկոյան ՀՀԿ-ականներին կրկին հավաքելու է Մելիք Ադամյան 2-ում: ՀՀԿ կենտրոնական գրասենյակում տեղի է ունենալու ՀՀԿ Գործադիր մարմնի նիստ: Այս մասին ԱԺ-ում լրագրողների հետ զրույցում ասաց ՀՀԿ խմբակցության ղեկավար Վահրամ Բաղդասարյանը:

Գործադիր մարմնի նիստի ժամանակ վերջնական որոշվելու է, թե ՀՀԿ-ականներից վաղը ովքեր են Նիկոլ Փաշինյանի թեկնածությանը կողմ քվեարկելու:

Նա նաեւ ընդգծել է, որ ՀՀԿ-ն պատրաստ է լինել ընդդիմություն: «Որևէ մեկը երաշխավորված չէ որոշ ժամանակ իշխանություն, հետո՝ընդդիմություն լինելուց, կամ հակառակը», - ասել է Բաղդասարյանը։

«Քաղաքականության մեջ մտնողը, եթե որոշել է, որ իր կյանքի ամբողջ ընթացքում պետք է լինի իշխանություն, ուրեմն նա չի մտել քաղաքականության մեջ, նա պարզապես մտել է իր հետաքրքրությունների համար։ Եթե մենք մեր քաղաքական դիրքորոշումները պահպանելով գնում ենք այդ ճանապարհով, մենք պատրաստ ենք լինել ընդդիմություն, բայց որևէ մեկ անգամ մենք չենք խանգարելու մեր երկրի հեռանկարային շահերին, անվտանգության խնդիրներին։ Ի տարբերություն մեր նախորդ ընդդիմադիրների՝ մենք պատրաստ ենք դրականը տեսնելու և քննադատելու բացասականը», - նկատել է նա։

Պատասխանելով այն դիտարկմանը, թե Փաշինյանի վարչապետ դառնալուց հետո նրան են ենթարկվելու ուժային կառույցները, հետևաբար չկա՞ մտավախություն, որ ՀՀԿ-ից բազմաթիվ պատգամավորներ դուրս կգան և ՀՀԿ-ն կդանա փոքրամասնություն, Բաղդասարյանն ասել է.«Ընկնում եք երազանքների ու ենթադրությունների գիրկը. ուժային կառույցը որևէ մեկի սեփականությունը չէ, առավել ևս սիրո, համերաշխության կոչ անողներինը: Դրանք ժողովրդինն են: Դուք ունեիք այն մտավախությունը, որ մինչ մայիսի մեկը առնետավազք պետք է սկսվի, ՀՀԿ-ն պետք է քայքայվի, բայց ամսի մեկին դուք եղաք ականատեսը, որ նման բան չեղավ: Եթե նման բան էլ լինի, կարևոր է, որ մեր քաղաքական դիրքորոշման մեջ փոփոխություն չլինի, իսկ ես հավատացնում եմ, որ նման բան չի լինի», - ասել է նա:

Անդրադառնալով հրապարակումներին, թե ՀՀԿ առաջին քվեարկության վրա ազդեցություն է ունեցել ՀՀ երկրորդ նախագահ Ռոբերտ Քոչարյանը՝ Բաղդասարյանը նշել է.«Ռոբերտ Քոչարյանին 5 տարի է դեմքով չեմ տեսել, հեռախոսով էլ չեմ խոսել։ Խնդրում եմ հանգիստ թողեք մեր երկրի նախկին նախագահներին», - նշել է նա՝ հավելելով, որ իր ղեկավարած խմբակցության վրա վերջիններս չեն կարող որևէ ազդեցություն ունենալ։