Պետք է զերծ մնալ լարվածությունը սրող հայտարարություններից. Ֆրանսիայի ԱԳՆ-ն՝ Ալիեւին

Ֆրանսիայի արտաքին գործերի նախարարությունն արձագանքել է փետրվարի 8-ին «Նոր Ադրբեջան» իշխող կուսակցության համագումարի ժամանակ Ադրբեջանի նախագահ Իլհամ Ալիևի՝ «Երևանը վերադարձնելու» հայտարարությանը։ Այս մասին տեղեկանում ենք Ֆրանսիայի ԱԳՆ կայքից, որտեղ տեղադրված է այս կապակցությամբ հարց ու պատասխան։

Տարված հարցում ասվում է, որ փետրվարի 8-ին Բաքվում Ադրբեջանի նախագահ Իլհամ Ալիևի կողմից իր կուսակցության ժողովի ժամանակ կրկին հայտարարել էր, թե «Երևանն ու Զանգեզուրը մեր պատմական տարածքներն են» ու «մենք՝ ադրբեջանցիներս, պետք է վերադառնանք այդ պատմական հողեր», «սա մեր քաղաքական ու ռազմավարական նպատակն է, որին մենք պետք է աստիճանաբար մոտենանք»։ Ինչպիսի՞ն է Ֆրանսիայի դիրքորոշումն այս դիտողությունների վերաբերյալ, որոնք ոչ միայն հակասում են Մինսկի խմբի սկզբունքներին, այլ նաև վտանգում են Հայաստանի գոյությանը, հարց է ուղղվում Ֆրանսիայի ԱԳՆ-ին։

Ի պատասխան Ֆրանսիայի ԱԳՆ-ն նշել է, որ Ֆրանսիան լիովին հավատարիմ է Լեռնային Ղարաբաղի հակամատության կարգավորման բանակցային լուծմանը։

«Հակամարտության կողմերին կոչ ենք անում բարեխղճորեն աշխատել այս ուղղությամբ՝ մասնավորապես զերծ մնալ ցանկացած հայտարարություններից կամ գործողություններից, որոնք կարող են սրել լարվածությունը»,-ասվում կայքում։

Ավելի վաղ Ալիեւի հայտարարությանն ավելի կոնկրետ արձագանքել էր ՌԴ ԱԳՆ-ի պաշտոնական Ներկայացուցիչ Մարիա Զախարովան: «Մոսկվայում, բնականաբար, տեսել են Ադրբեջանի նախագահ Ալիեւի հայտարարությունը՝ իշխող կուսակցության նիստին: Մենք քաջատեղյակ ենք, որ Ադրբեջանի ու Հայաստանի հարաբերությունները ծայրահեղ լարված են: Հնչած հայտարարությունը հստակ չի նպաստում լարվածության թուլացմանը»,-ասել է ՌԴ ԱԳՆ ներկայացուցիչը:

Հիշեցնենք, որ Ադրբեջանի նախագահ Իլհամ Ալիեւը, «Նոր Ադրբեջան» իշխող կուսակցության նիստի ժամանակ ելույթ ունենալիս, պատմել էր իրենց երկրի ստրատեգիական նպատակների մասին՝ կապված Հայաստանի հետ. «Երեւանը մեր պատմական տարածքն է, եւ մենք՝ ադրբեջանցիներս, պետք է վերադառնանք մեր պատմական հողեր: Սա մեր քաղաքական ու ստրատեգիական նպատակներից է, որին մենք է պետք է հասնենք կամաց-կամաց»,- ասել էր Ալիեւը: