Թուրքիան Ադրբեջանի և Վրաստանի հատուկ ջոկատայինների մասնակցությամբ անցկացնում է զորավարժություններ

Թուրքիայի, Ադրբեջանի և Վրաստանի հատուկ ջոկատայինների մասնակցությամբ նախօրեին Թուրքիայի տարածքում մեկնարկել են "Կովկասյան արծիվ" զորավարժությունները : Այդ մասին հայտնում է Թուրքիայի գլխավոր շտաբը:

«Մայիսի 31-ից հունիսի 10-ը Թուրքիան, Ադրբեջանը և Վրաստանը Թուրքիայի տարածքում համատեղ զորավարժություններ կանցկացնեն: Զորավարժությունների նպատակն է Թուրքիայի, Ադրբեջանի և Վրաստանի ԶՈւ-րի միջև համագործակցության, համակարգվածության և բարեկամական հարաբերությունների զարգացումը»,- նշվում է գլխավոր շտաբի հաղորդագրության մեջ:

Թուրքիայից զորավարժություններին մասնակցում է հատուկ ջոկատայինների մեկ ստորաբաժանում, երկու ուղղաթիռ, մեկ տրանսպորտային ինքնաթիռ, իսկ Վրաստանից և Ադրբեջանից զորավարժություններին մասնակցում է հատուկ ջոկատային մեկական ստորաբաժանում: