Բախում ՊՆ-ի մոտ. ձերբակալվել են անհետ կորած զինծառայողների երկու հարազատներ

44-օրյա պատերազմում անհետ կորած զինծառայողների երկու հարազատներ՝ Արսեն Ղուկասյանը և Ապիջան Սարգսյանը, ձերբակալվել են սեպտեմբերի 29-ին Պաշտպանության նախարարության շենքի մոտ տեղի ունեցած քաշքշուկի արդյունքում։ Քննչական կոմիտեից հաստատել են, որ նրանց մեղադրանք է առաջադրվել խուլիգանության և պաշտոնատար անձի գործունեությանը միջամտելու հոդվածներով, իսկ դատախազությունը միջնորդում է կիրառել կալանքը որպես խափանման միջոց։

Քրեական վարույթը նախաձեռնվել է ցուցարարների հետ բախումից հետո Պաշտպանության նախարարության և Ռազմական ոստիկանության ծառայողների կողմից ներկայացված հաղորդումների հիման վրա։ Ձերբակալությունների մասին առաջինը ֆեյսբուքյան իր էջում հայտնել է անհետ կորածների հարազատների փաստաբան Տաթևիկ Սողոյանը՝ հավելելով, որ դատարան արդեն միջնորդություն է ներկայացվել՝ որպես խափանման միջոց կալանավորումը կիրառելու վերաբերյալ։

Միջադեպը տեղի է ունեցել անհետ կորած զինծառայողների ծնողների և հարազատների կազմակերպած բողոքի ակցիայի ընթացքում։ Պաշտպանական գերատեսչության շենքի դիմաց հավաքվածները պահանջում էին հանդիպում ՀՀ ԶՈՒ գլխավոր շտաբի պետ Էդուարդ Ասրյանի և նրա խորհրդական, Լեռնային Ղարաբաղի Պաշտպանության բանակի նախկին հրամանատար Կամո Վարդանյանի հետ։

Ակցիայի ընթացքում ցուցարարների և Ռազմական ոստիկանության աշխատակիցների միջև տեղի է ունեցել քաշքշուկ, ինչն էլ հիմք է հանդիսացել դրա երկու մասնակիցների նկատմամբ հետագա իրավական գործողությունների համար։