Էդգար Ղազարյանը կոչ է անում պատգամավորներին անվստահություն հայտնել վարչապետ Փաշինյանին

Հասարակական-քաղաքական գործիչ Էդգար Ղազարյանն այսօր Ազգային ժողովի շենքի առջև լրագրողների հետ զրույցում հայտարարեց, որ իշխող «Քաղաքացիական պայմանագիր» կուսակցությունից կամ որևէ այլ քաղաքական ուժից որևէ ակնկալիքներ չունի: Նրա խոսքերով՝ դիմումն ուղղված է անմիջապես խորհրդարանի բոլոր 107 պատգամավորներին:

«Այն, ինչի վերաբերյալ պատրաստվում ենք նամակ հանձնել ԱԺ պատգամավորներին, դուրս է որևէ կուսակցության կամ խմբակցության իրավասությունների շրջանակներից և վերաբերում է բացառապես պատգամավորին՝ որպես ինքնավար քաղաքական պաշտոն զբաղեցնողի», - բացատրեց Ղազարյանը:

Նա նշեց, որ այս գործընթացի համար խմբակցության որոշում չի պահանջվում, ինչպես նաև հետագա քվեարկության համար. յուրաքանչյուր պատգամավոր ինքնուրույն է որոշում կայացնում:

Լրագրողների այն հարցին, թե արդյոք դիմումում նշված է վարչապետի հնարավոր թեկնածուն, Ղազարյանը հակիրճ ներկայացրեց նամակի բովանդակությունը. «Այստեղ ներկայացված են այս գործընթացի հիմնավորումները՝ հղում անելով Սահմանադրության 88-րդ, 94-րդ և 115-րդ հոդվածներին: Կցված է ԱԺ որոշման նախագիծը՝ ՀՀ վարչապետ Նիկոլ Փաշինյանին անվստահություն հայտնելու մասին: Որոշման տեքստում թողնված է դատարկ տեղ նոր վարչապետի անուն-ազգանվան համար: Այն, թե ով կարող է լինել վարչապետի թեկնածուն, կարող է որոշել միայն այն պատգամավորը, ով կդառնա այս նախաձեռնության հեղինակը»:

Ղազարյանն ընդգծեց, որ իրենք Ալեն Սիմոնյանից և մնացած 106 պատգամավորներից չեն պահանջում որևէ լրացուցիչ գործողություն՝ բացի իրենց ուղղակի պարտականությունների կատարումից:

«Մենք չենք ասում՝ այսպես արեք, մենք ասում ենք՝ եկեք միասին, պարոն Ալեն Սիմոնյան, կարդանք մեր երկրի Սահմանադրությունը: Սահմանադրության համաձայն՝ Ազգային ժողովը վերահսկում է կառավարության գործունեությունը: Կառավարությունն այն մարմինն է, որն իրականացնում է պետության ներքին և արտաքին քաղաքականությունը՝ կառավարության ծրագրի հիման վրա: Հիմա բացում ենք կառավարության ծրագիրը և տեսնում ենք, որ դրա դրույթները չեն կատարվում, և մեր երկրում միայն դուք կարող եք վերահսկել կառավարության ծրագիրը և անվստահություն հայտնել: Նիկոլ Փաշինյանը կարող է մնալ իրենց կուսակցության վարչության նախագահ, մենք իրենց կուսակցության հետ գործ չունենք, մենք գործ ունենք պետական պաշտոնյաների հետ», - եզրափակեց նա: