Մոսկվայի հետ շարունակվում են բանակցությունները հայկական երկաթուղու կոնցեսիայի վերաբերյալ

Հայաստանն ու Ռուսաստանը շարունակում են բանակցությունները հայկական երկաթուղու կոնցեսիոն կառավարման ապագայի շուրջ:

Պաշտոնական Երևանը նպատակ ունի վերանայել ենթակառուցվածքի կառավարման մոդելը՝ արևմտյան պատժամիջոցների ռիսկերից խուսափելու համար, սակայն գործընթացն իրականացնում է առանց հստակ ժամկետների և փորձում է գտնել փոխշահավետ լուծում:

Սեպտեմբերի 17-ին լրագրողների հետ ճեպազրույցում ՀՀ վարչապետ Նիկոլ Փաշինյանը վերահաստատել է, որ այս նուրբ հարցի շուրջ իրադրության էական փոփոխություն դեռևս չկա, իսկ քննարկումները շարունակվում են: «Դա մեր սեփականությունն է, և մենք մեր սեփականությունը տնօրինելու հնարավորություն պետք է ունենանք այնպես, ինչպես ուզում ենք»,- հայտարարել է կառավարության ղեկավարը։

Վարչապետն ընդգծել է, որ խնդիրը դիտարկվում է հանգիստ պայմաններում՝ այլ հարցերի հետ փոխկապակցվածության մեջ, և նպատակ կա այն լուծել հնարավորինս արագ ու բարեկամաբար:

Երկաթուղային ցանցի կառավարման շուրջ տարաձայնությունները հանրայնացվել էին 2026 թվականի մայիսին, երբ Փաշինյանը բարձրաձայնեց համակարգի զարգացմանը խոչընդոտող պատժամիջոցային ռիսկերի մասին։ Ներկայումս ցանցը շահագործում է ռուսական «Հարավկովկասյան երկաթուղիներ» ընկերությունը:

Երևանն ավելի վաղ առաջարկել էր փոխզիջումային տարբերակ՝ կոնցեսիոն կառավարումը հանձնել Հայաստանի և Ռուսաստանի համար բարեկամ որևէ երրորդ երկրի, քանի որ գործող մոդելը, ըստ հայկական կողմի, երկիրը զրկում է մրցակցային առավելություններից։ Այնուամենայնիվ, ռուս պաշտոնյաները բազմիցս հայտարարել են, որ կառավարումը երրորդ պետության փոխանցելն իրենց համար անընդունելի և ոչ նպատակահարմար սցենար է։