Երևանի և Բաքվի միջև պայմանագրի հապճեպ կնքումը կարող է վնասել տարածաշրջանին. Գալուզին

Ռուսաստանի արտաքին գործերի փոխնախարար Միխայիլ Գալուզինը «Իզվեստիա»-ին տված հարցազրույցում նախազգուշացրել է Արևմուտքի ճնշման ներքո հայ-ադրբեջանական խաղաղության պայմանագրի շտապողական կնքումից՝ ընդգծելով երկու երկրների միջև հարաբերությունների երկարաժամկետ կարգավորում ապահովող փաստաթղթի մշակման անհրաժեշտությունը։

ԱԳ փոխնախարարի խոսքով՝ Ռուսաստանը ողջունում է Հայաստանի և Ադրբեջանի միջև բանակցություններում ձեռք բերված առաջընթացը՝ նշելով երկու երկրների միջև հարաբերությունների կարգավորման գործընթացի մեկնարկում նախագահ Վլադիմիր Պուտինի առանձնահատուկ դերը։ Կարևոր պահ է եղել 2020 թվականի նոյեմբերին եռակողմ հայտարարության ստորագրումը, որը սահմանել է Ռուսաստանի աջակցությամբ կարգավորման ճանապարհային քարտեզը։

Գալուզինը նշել է, որ Մոսկվան դեմ է արևմտյան հարթակներում «շտապ փաստաթղթերի» կնքմանը, քանի որ չմտածված որոշումները կարող են ապագայում «հակամարտության սերմեր ցանել»։ Դիվանագետն ընդգծել է, որ նման սցենարը անցանկալի է թե՛ հենց Հայաստանի և Ադրբեջանի, թե՛ ամբողջ Հարավային Կովկասի և Ռուսաստանի համար։

Ռուսական կողմի առանձնահատուկ մտահոգությունն է հարուցում տրանսպորտային հաղորդակցության ապաշրջափակման և տնտեսական կապերի վերականգնման հարցով եռակողմ խմբի աշխատանքի դադարեցումը։ Մոսկվան կոչ է անում մասնակիցներին, հատկապես հայկական կողմին, վերադառնալ այս ձևաչափով աշխատանքին՝ հաստատելով կողմերի խնդրանքով անհրաժեշտ աջակցություն ցուցաբերելու պատրաստակամությունը։