Մի խումբ կոնգրեսականներ Թրամփին կոչ են արել ճանաչել Հայոց ցեղասպանությունը
ԱՄՆ-ի Կոնգրեսում Հայկական հարցերով հանձնախումբը՝ ի դեմս դեմոկրատներ Ֆրենկ Փալոնեի, Ջեքի Սփայերի, Ադամ Շիֆի եւ հանրապետականներ Դեյվիդ Թրթի, Դեյվիդ Վալադոյի եւ Գուս Բիրիլակիսի նամակ-խնդրագրով դիմել են նախագահ Դոնալդ Թրամփին՝ վերջինիս կոչ անելով ճանաչել Հայոց ցեղասպանությանը։ Միաժամանակ, Հայկական հանձնախմբի անդամները կոնգրեսականներին կոչ են արել իրենց ստորագրություններով միանալ Դոնալդ Թրամփին հասցեագրված երկկուսակցական նամակ-խնդրագրին։ Այս մասին տեղեկանում ենք ԱՄՆ-ի Հայկական համագումարից:
«Որեւէ կասկած չկա, որ 1․5 միլիոն հայեր կոտորածի են ենթարկվել 20-րդ դարի առաջին ցեղասպանության ժամանակ։ Օսմանյան կայսրությունում Միացյալ Նահանգների դեսպան Հենրի Մորգենթաուն արձանագրել է ցեղասպանության փաստը եւ տարատեսակ հիմնադրամների կոչ արել օգնել վերապրած հայերին։ Նախագահի կողմից ցեղասպանության ճանաչումը հարգանքի տուրք կլինի կորսված կյանքերին, վերապրածների հաստատակամությանը եւ մինչ օրս մեր երկիրը հզորացրած հայկական արմատներով ամերիկացիներին»,- նշվում է կոնգրեսականների՝ Թրամփին հասցեագրած նամակում։ Կոնգրեսականները նաև արձանագրել են, որ այդ հարցով նախագահի որոշումը կվերահաստատի նախկին նախագահ Ռոնալդ Ռեյգանի դիրքորոշումը, որը 1981 թվականին ճանաչել է Հայոց ցեղասպանությունը։
Կոնգրեսականները նաեւ Թրամփին կոչ են անում ապրիլի 24-ը Հայոց ցեղասպանության հիշատակի օր հայտարարել:
Աղբյուրը հիշեցնում է, որ ամերիկյան նոր վարչակազմի ձեւավորումից հետո սա Հայոց ցեղասպանության ճանաչման խնդրին երկրի նախագահի ուշադրությունը հրավիրելու առաջին փորձն է։
Նշենք, որ ի տարբերություն նախկին նախագահ Բարաք Օբամայի, ով խոստացել էր նախագահ ընտրվելու դեպքում ճանաչել Հայոց ցեղասպանությունը, Դոնալդ Թրամփը որևէ խոստում չի տվել և նրա դիրքորոշումը այս հարցում հայտնի չէ: Այս համատեքստում հնչած միակ հայտարարության հեղինակը ԱՄՆ պետքարտուղար Ռեքս Թիլերսոնինն է, ո վ Սենատում հայտարարել որ, որ «1915 թվականի ողբերգական իրադարձությունները մնում են որպես հայ-թուրքական հարաբերությունների ցավագին հարց, եւ ԱՄՆ-ն շահագրգռված է խաղաղ ու կայուն հարաբերություններ ապահովել այդ երկու երկրների միջև: Ես բաց երկխոսություն կպահպանեմ Հայաստանի և Թուրքիայի միջեւ՝ ի շահ տարածաշրջանի կայունության»։
