Մարուքյանը, Փաշինյանն ու Սարգսյանը հանդես կգան «ԵԼՔ դաշինքով»

«Լուսավոր Հայաստան» կուսակցությունը, «Հանրապետություն» կուսակցությունը, «Քաղաքացիական պայմանագիր» կուսակցությունը 2017 թվականի խորհրդարանական ընտրություններին կմասնակցեն «ԵԼՔ դաշինք» անվանումով։

«Քաղաքացիական պայմանագիր» կուսակցության անդամ, ԱԺ պատգամավոր Նիկոլ Փաշինյանը պարզաբանել է, թե ինչո՞ւ է ընտրվել հենց այդ անվանումը.
«ԵԼՔ՝ դժվար կացությունից, անհաջողությունից ազատվելու հնարավորություն՝ միջոց, վերելք՝ դեպի վեր տանող վերընթաց ուղի:
Է. Աղայան,Արդի հայերենի բացատրական բառարան:

«ԵԼՔ դաշինք»՝ Հայաստանը դժվար կացությունից, անհաջողությունից ազատելու հնարավորություն՝ միջոց, Հայաստանը վերելքի, դեպի վեր տանող վերընթաց ուղի:

Արդի Հայաստանի քաղաքական բառարան»:

Հիշեցնենք, կուսակցությունները դեկտեմբերի 12-ին ստորագրեցին քաղաքական համագործակցության հուշագիր, համաձայն որի՝ 2017 թվականի խորհրդարանական ընտրություններին և Երևանի ավագանու ընտրություններին կմասնակցեն միասնաբար ընտրական դաշինքով: