Հարկային պարտավորության դադարման դեպքերը կհստակեցվեն. ՊԵԿ նախագահի տեղակալ

Նախատեսվում է օրեսնգրքով կիրառվող հասկացությունները համապատասխանեցնել «Սնանկության մասին» օրենքով սահմանված կարգավորումների հետ, քանի որ այդ օրենքում որոշակի փոփոխություններ են եղել ու դրանցից բխում են նաեւ Հարկային օրենսգրքում կատարվող փոփոխությունները, նաեւ հստակեցնել հարկային պարտավորությունների դադարեցման հիմքերը. այս մասին ԱԺ հերթական նիստի ընթացքում ասել է Պետական եկամուտների կոմիտեի նախագահի տեղակալ Կարեն Թամազյանը՝ առաջին ընթերմամբ «Հայաստանի Հանրապետության հարկային օրենսգրքում փոփոխություններ եւ լրացումներ կատարելու մասին» օրենքի նախագիծը ներկայացնելիս:

«Մասնավորապես նախատեսվում է՝ եթե հարկային պարտավորությունը գերազանցում է 2 մլն դրամը եւ, եթե «Սնանկության մասին» օրենքով սահմանված կարգով կազմակերպության կամ ԱՁ-ի գործունեությունը դատարանի վճռով կհամարվի լուծարված, ապա հարկային պարտավորությունը եւս կդադարի: Եթե պարտավորությունը 2 մլն դրամից փոքր լինի, ապա այն կդադարի, եթե պարտավորության կատարման վերջնաժամկետից ԱՁ-ի դեպքում անցել է 7 տարի, ֆիզիկական անձանց դեպքում՝ 5 տարի: Այսպիսով, հստակեցվեն հարկային պարտավորության դադարման դեպքերը»,- ասել է ՊԵԿ փոխնախագահը:

Տնտեսական հարցերի մշտական հանձնաժողովի դրական եզրակացությունը ներկայացրել է նույն հանձնաժողովի անդամ Հովիկ Աղազարյանը: Պատգամավորը հայտնել է, որ օրենքը հիմնականում տեխնիկական բնույթի փոփոխություններ է իրենից ենթադրում: