Ոչ պատգամավորներին, ոչ ընտանիքի անդամներին Աշոտյանին տեսակցել չեն թույլատրում
ՀՀԿ փոխնախագահ Արմեն Աշոտյանին այցելությունները սահմանափակված են: Այս մասին լրագրողների հետ ճեպազրուցում հայտարարեց ՀՀԿ ԳՄ անդամ Արտակ Զաքարյանը:
Նա տեղեկացրեց, որ կալանավորված ընդդիմադիր գործչի մոտ ոչ մեկին չեն թողնում, անգամ պատգամավորներին ու ընտանիքի անդամներին: Միայն փաստաբանների միջոցով է հնարավոր իմանալ նրա որպիսիության մասին: Բայց
«Վստահ ենք, որ Արմենը ամուր է, իր գաղափարական հայացքներում վճռական է: Ոչինչ չի կարող լռեցնել ո՛չ Արմեն Աշոտյանին, ո՛չ մյուս քաղբանտարկյալներին»,- վստահեցրեց Արտակ Զաքարյանը:
Նա նաև հավելեց, որ եթե Արմեն Աշոտյանը կալանավորվեր, օրինակ, Ֆրանսիայում, ապա ԵՄ-ն և ԱՄՆ-ն անմիջապես նրան քաղբանտարկյալ կճանաչեին:
Հանրապետական կուսակցության փոխնախագահ, կրթության նախկին նախարար Արմեն Աշոտյանը երկու ամսով կալանավորվեց հունիսի 16-ին: Ըստ Քննչական կոմիտեի՝ Աշոտյանը խախտել է խափանման միջոցի պայմանները: Նա Բժշկական համալսարանում չարաշահումների գործով մեղադրվում է պաշտոնեական դիրքի չարաշահման և փողերի լվացման հոդվածներով, որն առաջացրել է ծանր հետևանքներ։ Փաստաբան Տիգրան Աթանեսյանը նաև հայտնել էր, որ Աշոտյանի մեղադրանքը լրացվել է, ավելացվել է նաև վատնում կազմակերպելու հոդվածը։