Վարչապետ Նիկոլ Փաշինյանն այսօր, ելույթ ունենալով խորհրդարանում, կրկին խոսեց Բաքվի հետ հարաբերությունների կարգավորման համատեքստում «փոխզիջումային և երբեմն ցավոտ լուծումների» մասին։
Նրա խոսքով, խաղաղության ձեռքբերումը ենթադրում է հարաբերությունների կարգավորում բոլոր հարեւանների հետ։ Քանի որ Իրանի և Վրաստանի հետ հարաբերությունները ոչ թե կարգավորման, այլ միայն առավելագույն խորացման կարիք ունեն, հետևաբար խաղաղությունը նշանակում է հարաբերությունների կարգավորում Թուրքիայի և Ադրբեջանի հետ, ասաց նա։ Փաշինյանը նշեց, որ այստեղ ամենակարեւոր հարցն այն է, թե որքանով է դա իրատեսական։ Միևնույն ժամանակ, շարունակեց նա, այս հարցը երկու կողմ ունի. նախ՝ Ադրբեջանի քաղաքականությունն ու գործողությունները որքանո՞վ են ուղղված խաղաղությանը և երկրորդ՝ որքանով Հայաստանի քաղաքացիները կընդունեն 44-օրյա պատերազմից հետո ձեռք բերված փոխզիջումային ու երբեմն ցավոտ որոշումները և թույլ կտան դրանց իրականացումը։
«Բայց դա նաև մեր պարտականությունն է։ Մենք պետք է մեր քաղաքացիներին բացատրենք մեր մտքերի ու գործողությունների ընթացքը։ Եվ երբ սա հասկանան, այն ժամանակ կընդունեն»,- վստահ է Փաշինյանը։
Դիմելով խորհրդարանական մեծամասնությանը, Փաշինյանը նշեց, որ «հայտնի ուժերի» նպատակն է ճեղքել իշխանություն-ժողովուրդ շփման թելը, համոզվել, որ «մենք փակվենք մեր գրասենյակներում, կառավարական շենքերում և կորցնենք զգացմունքային, տեսողական և քաղաքական կապը ՀՀ քաղաքացիների հետ»:
Նա ընդգծեց, որ խաղաղություն հնարավոր է, եթե ամրագրվի, որ «29,8 հազար քմ տարածքը ճանաչում ենք որպես Հայաստանի Հանրապետություն, իսկ ավելի կոնկրետ՝ Խորհրդային Հայաստանի տարածք, որի վրա անկախություն է ձեռք բերվել 1991 թվականին, եւ մենք ոչ միայն տարածքային պահանջ չունենք որեւէ այլ երկրի նկատմամբ, այլեւ երբեք էլ չենք ունենալու»։
«Եթե մենք չհամախմբենք այս գաղափարը, եթե այն չվերածենք մեր հասարակության սոցիալ-հոգեբանական դիրքի, ոչ ոք մեզ թույլ չի տա զարգանալ։ Որովհետև ոչ ոք չի համակերպվի այն փաստի հետ, որ մենք զարգանում և հզորանում ենք, որպեսզի այս ուժին ուղղենք ուրիշների դեմ, որպեսզի ընդլայնենք մեր տարածքները։ Ավելին, նման պայմաններում այս երկրների խնդիրն է լինելու ոչ միայն կանխել մեր զարգացումն ու հզորացումը, այլ կանխել մեր պետության գոյությունը, իսկ նման իրավիճակում մեզ ոչ ոք չի օգնի»,- ասաց նա։ Ուստի Հայաստանի զարգացման օրակարգի ռազմավարական նպատակը պետք է լինի տարածաշրջանում ներդաշնակ ու խաղաղ գոյակցությունը, վստահ է Փաշինյանը։
Նա ընդգծեց, որ իր ասածը ամենևին չի նշանակում «պատմությունը մոռանալ», այլ ինքն առաջարկում է «փոխել սոցիալ-հոգեբանական ընկալման անկյունը»։
