Դատախազությունը ներկայացրել է ողբերգական հրդեհի քրեական վարույթում առկա փաստական տվյալները
Զինվորական դատախազությունն անդրադարձել է Գեղարքունիքի մարզի Ազատ գյուղում տեղակայված կացարանում տեղի ունեցած դեպքի շուրջ հանրային տիրույթում առկա մտահոգություններին և ներկայացրել քրեական վարույթում առկա փաստական տվյալները:
Դեպքի ընթացքում ննջարանի դուռը փակ չի եղել.
Դեպքի պահին տան ննջարանի դռան փակված լինել/չլինելու հանգամանքը նախաձեռնված քրեական վարույթի շրջանակում քննության առարկա է դարձել: Հարցաքննությունների արդյունքում տվյալներ են ստացվել այն մասին, որ հրդեհի բռնկման ժամանակ տան ննջարանում/զորանոցում գտնվող 17 զինծառայողներից մահացած 14-ի մարմինները հայտնաբերվել են այդ սենյակի տարբեր հատվածներում, իսկ մեկ զինծառայողինը՝ կացարանի նախասրահում, որտեղ տեղադրված է եղել վառարանը, ինչն առերևույթ նշանակում է, որ այդ զինծառայողը կարողացել է ննջարանից դուրս գալ:
14 զինծառայողների մարմինները հայտնաբերվել են ննջարանի տարբեր հատվածներում.
Քրեական վարույթում առկա փաստական տվյալների համաձայն՝ 14 զինծառայողների մարմինները հայտնաբերվել են ոչ թե բացառապես մահճակալների վրա, այլ ննջարանի տարբեր հատվածներում: Միաժամանակ, ՆԳՆ փրկարար ծառայության համապատասխան աշխատակիցը, ով հանրային առաջին հեռուստաալիքի եթերում հայտարարել էր, որ մահացած 15 զինծառայողներից 14-ի մարմինը հայտնաբերվել են մահճակալին պառկած, հարցաքննվել է նախաքննական մարմնի կողմից: Նա ցուցմունքով հերքել է այդ հանգամանքը և հայտնել, որ դեպքի վայրում անձամբ չի գտնվել, տեղում հրդեհաշիջման աշխատանքներն իրականացրած աշխատակիցների կողմից իրեն բանավոր փոխանցված տեղեկությունը սխալ է ընկալել, ինչպես նաև տվյալ դեպքի հասարակական հնչեղության պատճառով գտնվել է հուզված վիճակում, ինչով պայմանավորված սխալ տեղեկություն է հայտնել հաղորդման ընթացքում:
Դեպքի օրը տրանսպորտային միջոցների մեկնարկիչները գործի գցելու նպատակով ստորաբաժանմանը հատկացված ավտոբենզինով լցված տասը հատ հինգ լիտրանոց պլաստմասե տարա է հայտնաբերվել.
Քրեական վարույթի նախաքննությամբ ձեռնարկված քննչական և այլ վարութային գործողությունների արդյունքում ձեռք բերված փաստական տվյալներով պարզվել է, որ տրանսպորտային միջոցների մեկնարկիչները գործի գցելու նպատակով ստորաբաժանմանը 2023 թվականի հունվարի կեսերին հատկացվել է 80 լիտր ավտոբենզին՝ լցված 5 լիտրանոց պլաստմասե տարաների մեջ, որոնք պահվել են կացարանի հարակից տարածքում բացազատված ավտոհավաքակայանում: Դեպքի օրը՝ նախքան հրդեհը, նշված վայրում փաստացի մնացել է ավտոբենզինով լցված տասը հատ հինգ լիտրանոց պլաստմասե տարա: Դրանցից ինը հրդեհից հետո դեպքի վայրի զննությամբ հայտնաբերվել և առգրավվել են. բացակայել է 1 հատ տարա, որն ըստ վարույթում առկա փաստական տվյալների՝ օգտագործվել է սպայի կողմից կացարանի նախասրահում տեղադրված վառարանը վառելու համար:
Ինչո՞ւ չեն այրվել աթոռն ու գազօջախը:
Դեպքի վայրում, մասնավորապես՝ տան հարևանությամբ հայտնաբերված աթոռի և գազօջախի շուրջ նույնպես քննություն է կատարվել և գործում առկա նախնական տվյալների համաձայն՝ դեռևս 2021 թվականի մայիսին, երբ տվյալ ստորաբաժանումը տեղակայվել է այդ տանը, նախասրահում տեղադրված է եղել գազօջախ, իսկ տունը գազաֆիկացված չի եղել, ուստի անձնակազմը այն դուրս է բերել և դրել տան հարևանությամբ, որպեսզի իրենց չխանգարի: Ինչ վերաբերում է աթոռին, ապա այն նույնպես դրված է եղել դրսում՝ գազօջախի հարևանությամբ և օգտագործվել է որպես հենարան, որի վրա կանգնելով կատարել են ծխատար խողովակի մաքրման աշխատանքներ:
